Tigulang Mireklamo Kontra sa Postmaster; Tseke sa Retirement Wa Nahatag?

MIREKLAMO kagahapon ang usa ka 67-anyos nga retiree batok sa usa ka postmaster tungod sa matud pa, kapakyas niini sa pag-remit sa tseke alang sa iyang pag-retiro.

Si Leonor Roble y Gomez, 67-anyos, usa ka retiradong empleyado nga taga Purok 1-A, Barangay San Juan, Surigao City, nagpatabang sa pulis tungod sa kalibog asa na naadto ang iyang Social Security System (SSS) Lumpsum Check Retirement Benefit.

Sa iyang sumbong ngadto sa kapulisan, gisulti sa tigulang nga ang iyang tseke numero 007895-SSSCDO nga penetsahan ug Agosto 15, 2007, wala gyod mahatag kaniya sa Postmaster/messenger sa Post Office, sa Kaskag, Surigao City.

Ginganlan sa tigulang ang usa ka GEMMA BORJA nga taga Nueva Street, Surigao City nga maoy naghawid sa iyang tseke.

Ang tigulang nag-ingon nga sa pag-adto niya sa Post Office, Kaskag, Surigao aron unta sa pagkuha sa SSS Lumpsum check kagahapon, September 6, 2007, wala gihapon niya makuha ang iyang tseke.

Gidugang sa tigulang nga igo lang siyang gisultihan sa empleyado sa Post Office nga ang iyang tseke atua sa kustodiya ni Postmaster/messenger, GEMMA BORJA.

Wala pa hinuon makuha ang reaksyon sa ginganlan nga Borja ning maong sumbong sa tigulang.

Wala usab masayri naunsang pagka-hitaboa nga nagkalibog-libog man ang pagkuha sa maong tseke. Gisubay na karon kining maong kaso. (J. Jayme)