Daw Gipauso na pod ang pagpamusil-patay sa lain-laing dapit sa dakbayan sa Surigao. Labing ulahing biktima mao ang usa ka Salvador Rendon, Jr., y Edulan 28-anyos and edad, ug usa ka ulitawo.

Matud sa report, si Rendon, gipusil sa wala mailhing killer didto sa Gemina-Vasquez Streets, Surigao City alas 6:30 ang takna niadtong miaging gabii.

Matud sa report, human gayod nadawat sa pulisya ang tawag labot sa kasong pagpamusil, nagdaling gisusi kini ni SPO2 Venerando C. Dagooc, apan gitaho nga ang biktima gidala na ngadto sa Miranda Family Hospital.

Apan gitug-an sa balita sa tambalanan, gideklara dayon sa mga doctor nga patay na kini paghidangat sa tambalanan.

Duha ka samad pinusilan ang naangkon sa biktima dinha sa iyang likod, ug kini maoy gituohang hinungdan sa iyang hinanaling kamatayon.

Narekober sa mga imbestigador gikan sa lugar sa krimen ang duha ka mga gipaboto na nga mga basiyo ug usa ka nabalingag nga bala sa kalibre .45. (AIREN SINDAY)

Read More...

PATAY DIHA-DIHA ang usa ka 22-anyos nga ulitawong walay trabaho, human gipusil gamit ang BUKAKANG (shotgun) sa usa ka 64-anyos nga mag-uuma, didto sa Barangay Hanagdong, Malimono, Surigao del Norte niadtong usa ka adlaw.

Ang balik-balik nga pagpangawat maoy gitumbok nga rason sa nahitabo.

Sa pulis report sa Malimono PNP ngadto sa Surigao del Norte Police Provincial Office sa Surigao City kagahapon, giila ang biktima nga mao si Ronilo Matos y Perez, 22-anyos, taga barangay Hanagdong.

Ang suspek, giila pod nga mao si Restituto Casoy y Balladares, 64-anyos ang edad, usa ka mag-uuma nga molupyo gihapon sa barangay Hanagdong.

Duha ka higayon gyud nga gipusil ug BUKAKANG ang biktima, hinungdan nga namatay gayod kini.

Sumala sa report, naka-angkon ug daghang samad sa tuo nga hawak ug wala nga dughan ang biktima, hinungdan sa iyang hinanaling kamatayon.

Sa pagresponde hinuon sa mga pulis, walay langan nga nasikop ang suspek.

Apan ang armas gikataho nga wala na igkita, human kini matud pa gilabay sa suspek ngadto sa sapa.

Ang balik-balik nga kasong kawat, maoy gitumbok sa pulisya nga motibo ning maong insidente.

Ang suspek, gitanggong karon sa selda sa Malimono PNP.

Giandam na ang papeles alang sa pagpasaka sa tukmang kaso batok sa suspek.

Read More...

MIAMPO na ang suspek sa pagpusil sa usa ka bag-ong daug nga kapitan sa barangay Balibayon, Surigao City dili palang dugay.

Si Macario Balaga y Ocampo, 49-anyos and edad, usa ka mananagat, ug molupyo sa Barangay Balibayon, boluntaryong mitahan sa iyang kaugalingon ngadto kang Surigao City councilor Leonilo Aldonza sa Brgy. Luna, niadtong Nobyembre 24, 2007.

Matud sa report, si Balaga maoy gitudlo nga suspek sa pagpausil kang Arturo Ligaya y Adtoon, 45-anyos ang edad, bag-ong napili pag-usab nga kapitan sa Barangay Balibayon, alas 6:00 sa sayong gabie niadtong Nobyembre 23, 2007.

Temporaryong gipailawom sa custodial investigation ang suspek, samtang giandam pa ang tukmang kaso nga ipasaka batok kaniya.

******************************************

Get Freebies from Xpango

Xpango is a website where users can earn credits (points) to exchange for the gifts or products they ever wanted. It is FREE and no charges apply( Delivery fees are Free too). Xpango offers international service where the gifts will be sent worldwide.

There are 3 ways to earn credits(points):
1. Refer friends (earn 1 points)
2. Participate in Xpango Offers (Optional. Earn 2-3 points)
3. Buy stuff from Xpango. (Optional. Points earn depends on stuff you buy.)

I give a good deep consideration before joining Xpango and finally decided to join. I told myself, "It is not a bad thing to give it a try!".

So, what are the gifts offered by Xpango. Nia sa ubos ang mga samples:



The gifts I decided to get is Apple IPod Nano which cost 13 points. So, if you are interested, please Sign Up using the referral link below and get the gift you ever wanted.

Get The Gift You Ever Wanted Free!

Read More...

PATAY ANG USA KA TATAY, samtang missing ang iyang anak dihang nalunod ang ilang gisakyang pumpboat dungan sa pagkuso-kuso sa bagyong Mina didto sa kadagatan sa Daku Island, sa lungsod sa General Luna, Siargao, Surigao del Norte alsa 9:00 ang takna sa buntag niadtong usa ka adlaw, Nobyembre 22, 2007.

Sa spot report sa General Luna PNP ngadto sa Surigao del Norte Police Provincial Office giila ang namatay nga mao si VICENTE DULGUIME, Sr., samtang ang iyang anak nga si VICENTE DULGUIME, JR. 7- anyos ang edad wala pa usab igkita. Ang mga Dulguime giingong pulos molupyo sa barangay 2, Gen. Luna, Surigao del Norte.

Matud sa pulis report ang pagkalunod sa pumpboat nahitabo tungod sa paglatos sa bagyong Mina ngadto sa kadagatan sa Surigao del Norte, CARAGA Region.

Sa pagkasayod sa pulisya sa nahitabong pagka-lunod gilayong naglunsad kini ug Search and Rescue Operation nga pinangulohan ni PO2 Reynaldo Copag ug uban pang may katakos sa rescue.

Ala 1:00 na sa tungang gabii niadtong Nobyembre 23, 2007 nakabalik ang rescue team, apan patay na si Vicente Dulguime, Sr. dihang ilang narekober. Gikumpirma pod nga ang anak nga si Vicente Dulguime, Jr. wala gayod igkita.

Read More...

Gisaway pag-ayo halos kada adlaw diha sa programa sa radyo pinaagi sa usa ka komentarista ang tindahan sa prutasan diha sa likod na bahin nan Luneta Park ning dakbayan sa Surigao tungod sa kahugaw, kayagaw ug pagka barado sa trapiko.

Gipasabot sa maong magsisibya nga ang dagway sa maong mga tindahan sa prutasan dili hinlo tungod sa mga nagkalat ang mga panit ug liso sa mga prutas way klaro ang basurahan ug kalat sa mga kahon, ang atop sa ilang mga tindahan ijahay nga mikamang sa paingon sa dalan halos wala nay kaparkingan sa mga sakyanan nga mamalitay dugangan pa sa mga kariton nagparking sa matag tindahan.

Misamot ka maot, hugaw tan-awon ug kayagaw ang hulagway sa prutasan tungod kay ijahay isab ang mga manindahay ug taplak sa nagkadaiyang mga klase material aron maoy idingding ug iatop

Kini nga mga isyu gitumbok sa maong magsisibya ngadto sa mga hingtungdan ug sa mga napiling opisyal ning dakbayan nga matud pa nagbuta bungol lamang ug wala mopakita sa ilang mga lihok aron masulbad kini.

Apan niining bag-o pinaagi sa Quick Action Response Team ni City Mayor Casurra ug sa pag-abag sa ma-abtik usab na Kag. Nilo Aldonza gi-aksyonan dayon ang maong problema uban sa pag-abag sa bag-o usab nga napili pagka presidente sa Surigao Fruit Vendors Association nga si Josefina Jarro nakita nga niini karon bag-o ang kahapsay tungod kay luag na ang hawanan, parkinganan ug mayo ang plastada sa mga tindahan, hinlo ug labaw sa tanan ang kanindot sa hulagway nga makita sa maong prutasan.

Gawas nga dan-ag, gwapa ug hapsay ang amo mga tindahan diri sato prutasan nakatabangan usab kini kay nahimo man kini nga usa sa mga sentro sa atong atraksyon dinhi sa ato syudad, puede na gani ini himuon na isa sa mga tourist destination oh diba bungga,” matud pa ni Jossie Jarro, ang President sa SFVA.

Ug sa iyang (Jossie) dugang pamahayag, siya miingon, “Pasalamatan gyud namo pag-ayo si City Mayor Casurra ug Kag. Nilo Aldonza sa iya kanunay nga pagsusi diri namo halos kada adlaw, sa pagpaigo na pagplastar ug pagtabang kon unoy angayan ug marajaw sa amo mga tindahan para magana tan-awon.”

-from Surigao City Newswatch

Read More...

Gidayeg ni Presidente Gloria Macapagal-Arroyo ang mga nangulo sa Regional Disaster Coordinating Council (RDCC) Caraga Region sa nahimo nilang aksyon sa bag-uhay pa lamang nga trahedya sa probinsya nga nagkutlo ug pito ka mga kinabuhi atol sa iyang pagbisita karong adlawa, Huwebes, Nobyembre 22, 2007 sa syudad sa Surigao.

Si Pangulong Arroyo, kinsa gikan pa sa syudad sa Iligan, personal nga nubisita sa mga lugar nga naapektuhan sa landslide ug iyang gipulong ang mga opisyales ug miyembro sa RDCC aron iyang masusi kung unsay mga lakang ang himuon sa mga napektuhang nga lugar. “Be a climate baker rather than a climate maker. We cannot prevent disaster but certainly we can undertake adaptation measures to prevent the lost of life and reduce damage to property,” sulti pa sa Presidente.

Sa iyang pulong, iyang gikalipay ang hiniusang paglihok sa mga ahensya sa gobyerno ug local government sa pagtabang sa mga biktima.

Kung kahinumduman, 7 ang patay sa managlahing pagdahili sa yuta sa lalawigan saa Surigao del Norte tungod sa pagbunok sa makusog nga ulan atol, sa bagyong si Lando nga miigo sa probinsya niadtong lunes, Nobyembre 19.

Sa maong tigum usab iyang gipahismulan ang paghatag ug financial assistance sa mga nabiling pamilya sa mga biktima nga nukabat sa P127,000.00 kada pamilya gikan sa iyang Presidential Social Fund, pondo sa NDCC ug sa DSWD.

Gikan sa Surigao del Norte, midalikyat gilayon ang presidente sa syudad sa Tandag aron usab sa pagtan-aw ug pag turn-over sa mga pipila ka mga infrastructure projects sa lalawigan sa Surigao del Sur. (PIA)

Read More...

NAUKAY ang barangay Cagniog, tungod sa nakit-ang patay nga lawas didto niadtong usa ka adlaw.

Sa pagsubay sa mga sakop sa Scene of the Crime Operatives (SOCO) nasuta nga ang patay nga nagsugod na ug kadugta, iya sa usa ka Danilo “Danny” Grey y Taico, walay trabaho, lumad nga taga Dumaguete City apan nanimuyo na sa Purok 2, Barangay Cagniog, Surigao City.

Matud sa Pulis report, usa ka Reynaldo Tejado y Resare, ang nagtug-an nga gipahibalo na lang sila nga may patay nga nakit-an didto sa usa ka barong-barong, hinungdan nga ilang gisusi uban sa mga teenagers nga unang nakakita niini.

Walay nakit-ang suicide notes sa dapit nga nakit-an ang patay.

Hinuon, gipailawom gihapon sa awtopsiya ang patay nga lawas aron pagsuta ug pagsiguro kung wala ba gyuy foul play nga nahitabo ngadto sa biktima.

Read More...

Patay ang usa ka 34-anyos nga mananagat human kini nakuryentehan didto sa Sitio Buyho, Brgy. San Jose, Surigao City niadtong usa ka adlaw.

Matud sa Pulis report sa Surigao City PNP, ang biktima mao si Roland Catulmo, 34-anyos nga taga San Jose, usa ka minyo ug usa ka mananagat.

Sumala sa report ni Romeo Rodolfa y Cebedo, 58-anyos nga mananagat usab kinsa uyoan sa biktima, ang iyang pag-umangkon nga si Roland, nagbitbit ug sin (zinc) aron iatop sa gitrabaho nilang kusina dihang misaghid kini ngadto sa usa ka kuryente, ug nakuryentehan kini. Patay gyud diha-diha ang biktima.

Nagpadayon pa ang pagsubay sa mga awtoridad ning maong kaso. (Airen I. Sinday)

Read More...

Para sa dugang na balita bisitaha ang http://surigaotoday.blogspot.com.

Read More...

Pakibisita rakan an blogsite sa amo silingan.. http://surigaotoday.blogspot.com para sa mga detalye.

Read More...

GI-ALERTO karon ang mga awtoridad sa Surigao City, batok sa pag-abot matud pa sa siyudad sa Surigao sa dugang pang suspek sa pagdagit ug pagtadtad-patay sa usa ka 7-anyos nga bata didto sa Basilisa, Dinagat Province di pa dugay.

Mismong si mayor Alfonso Casurra ang nagbutyag sa usa ka interbyu sa radyo kagahapon buntag (Biyernes) nga may nagtext na kaniya ug nagtug-an nga nakaabot na sa Surigao ang wala pa nadakpan nga mga suspek sa ngilgig nga pagpatay sa 7-anyos nga si Cedie Estoconing, kansang patay nga lawas nakit-an didto sa suba sa Brgy. Diegas, Basilisa, Dinagat putol na ang ulo, walay tuway-tuway, ug wala na poy mgainternal organs.

Ang mayor nagtug-an nga pipila ka mga katawhan sa mga barangay didto sa isla sa Hikdop nga sakop sa Surigao City nagbutyag nga may namatikdan silang mga ‘dayo’ sa ilang lugar nga naka-bonnet ug nakamaskara. Dili pa hinuon ciento por ciento nga klaro kung ang maong mga naka-bonnet ug nakamaskara nga mga tawo mao na gyud ang mga killey ni Cedie.

Sumala sa inahang si Rosemarie, nawala ang bata niadto pang Oktubre 21, 2007.

Ang nadakpang unang mga suspek nga anaa sa presohan, nga giilang sila si Narciso Barrientos, 54-anyos ang edad ug Fermin Abear, 23-anyos giingong miangkon nga sila maoy nagkidnap sa maong bata.

Ang report nagpasabot nga ang mga dinakpang suspek, misulti nga gikidnap nila ang maong bata aron lamang na maka-kwarta sanglit ila unta kining ipalukat sa ginikanan sa kantidad nga 10,000.00 pesos. Ang bata samtang gikidnap, giingong gisulod sa mga suspek sa sako sa uling,apan sulod sa sako namatay ang biktima. Ug tugod kay namatay na, matod sa report, gikuha sa mga suspek ang mga “internal organs” sa bata aron nga magamit sa ginganlan ug Allan Nadunza para sa panambal o madyik.

Gitaho nga pipila ka adlaw saw ala pa makit-i ang lawas sa biktima, usa ka 10-anyos nga bata ang nakakita sa biktima nga gitabonan sa mga suspek ug dahon sa saging ang biktima duol lang sa ilang panimalay.

Kasong kidnapping with homicide ang gisagpa batok sa mga suspek.

Apan may report nga nagtug-an nga gawas sa unang na-preso may mga kauban pa usab sila, apil na ang mastermind nga naglikay-likay karon sa kamot sa balaod, ug gituohang nagtago karon sa pipila ka dapit sa Surigao City.

Ang grupo mao pod ang gidudahang nagpaluyo sa tulis-tulis sa Dinagat Province ug mga silingang lugar.

Read More...

Kuyaw gyod ning Pinoy, Bisan sa mga trahedya nga manghitabo makahimo pa gihapon sa pagkomedya. Tan-awa, dihang gibombahan ang kongreso niadtong Martes sa gabii, haskang daghana dayon ang palabtik nga sugilanon.

“Sus, kung di pa ABSENOT SA SESYON si Sir, patay unta…”

He-he-he… wa diay motambong sa sesyon si cong…

xxxx

GIKONDENA sa mga opisyales sa Caraga Region ang nahitabong pagbomba sa Kongreso.

O, di ba pang-headline sa local tabloid?

xxxx

Ang tag-as nga opisyales sa Caraga Region, gawas nga mikondena sa nahitabong pagbomba, hugot pod nga mikuhit (HAPAK ang tawag kung kusog) sa mga law enforcement agencies aron lihokon ug sulbaron ang maong hitabo ug sa ingon masilotan dayon ang mga malapason.

Ha-hayyy… Wala gain masulbad ang pagpatay kang Ninoy AQUINO nga klarong may sundalong escort, ang pagbomba pa nga wala gain bisan usa nga nasayod.

xxxx

Medyo gibati daw ug kaikog ang mga Pulis sa lain-laing rehiyon sa tibuok nasod sa nahitabong pagbomba sa Batasan Complex. Human sa nahitabo, gideklara dayon sa PNP ang HEIGHTENED RED ALERT sa kapulisan. Pero dili lang daw tungod sa BOMBA SA CONGRESS.

“Red Alert para Pasko daw…”

NGiiiihh!

xxxx

Bitaw, SERIOUS, Husto gyod sa congressman Ompong Plaza sa lone district sa Agusan del Sur sa iyang pag-ingon nga “dakong black eye” sa TURISMO ug INVESTMENTS ang nahitabong pagbomba sa kongreso.

Sagdi lang Sir Ompong, total sa report sa goberno ni Ate Glo… IMPROVED ECONOMY man ta. Strong Peso pa gyod, di ba?

May nag-suicide lang hinuon kay wala nay makaon…

Read More...

Ang kagamhanan sa probinsya sa Surigao del Norte pinaagi ubos ni Gobernador ROBERT ACE BARBERS ug ang Department of the Interior and Local Gov’t. (DILG), mipasiugda ug duha ka adlaw nga Building A LLIANCE Workshop sa City Hall Function Room bag-ohay pa lamang.

Si Mr. Rodulfo Nasi, ang atong Prov’l Director sa DILG mapasigarbohong mibutyag nga ang probinsya sa Surigao del Norte mao ang pinaka-una nga mipasiugda ug malampuson nga mihimo sa Building Alliance Workshop sa tibuok Caraga Region.

Malipayon ug mapasalamaton ang batan-ong gobernador sa paghatag ug importansiya ug pagtambong sa nagkalain-laing mga representante ilabi na gyud sa mga LGU officials, diin ilang gipakita ang panaghiusa pinaagi sa pagsabot sa mga prayoridad nga mga proyekto alang sa tanang katawhan, ug alang sa kalambuan sa katawhang Surigaonon.

Kini gihatag sa positibong aksyon ug kinasing-kasing nga pagkomitir sa Gobernador ingon man usab sa mga board members pinaagi ni SP member Regina Alaan.

Ang tigom gitambongan sa mga Prov’l Officials, Mayores sa kalungsuran sa tibuok probinsya, MPDC’s (Municipal Planning and Dev’t. Coordinators), NGO’s, NGA’s ug mga Department Heads sa kapitolyo nga mainitong giwelcome sa Gobernador. (PGO-Media Affairs Office)

Read More...

NA-LANDING gyod sa tambalanan ang usa ka mister, human gilubngan ug ice pick ang likod atol sa laing kaso sa PAREGLA sa Narciso St., Brgy, Washington, Surigao City, alas 11;00 ang takna sa buntag niadtong usa ka adlaw, Nobyembre 13.

Ang biktima giilang si Joey BrigoleY Prota, 23 anyos ang edad, minyo, walay trabaho ug molupyo sa Montalbo Apartment, km 1 (nat’l. Highway), Surigao City.

Matud sa pulis report, usa ka Mrs. Shane Brigole, asawa sa biktima ang midangop sa pulisya ug nagtug-an nga samtang siya ug ang iyang bana, kuyog ang duha sa ilang mga paryente mi-aksyon na paglakaw niadtong tungora, kalit lang nga usa ka lalaking wala mailhi nga kauban sa wala usab maila nga grupo sa mga tawo, ang miduol. Wala nay daghang istorya, gidunggab dayon ang likod sa biktima gamit ang usa ka ice pick.

Pagkakita sa duha ka kauban sa biktima, miaksyon sila sa pagduol sa mga suspek, apan paspas kini nga nanagan sa manglahi na mga direksyon ngadto na sa Kaimo Street, Surigao City ug uban pang lugar.

Gidali pagdala ngadto sa Caraga Regional Hospital ang biktima aron matambalan, samtang wala na gyod igkita ang mga suspek.

Sa pagkakaron, gipadayon pa sa pulisya ang pagsubay ning maong kaso. (Airen I. Sinday)

Read More...

Mangayo diay ko ug despensa sa atong mga magbabasa sa LIBOTER, gitexsan intawon ta (0919-504-4780) sa atong mga magbabasa ug gibutyag kita nganong “dili permi" ang atong lindog, ingon daw nato LIBOTER, unya dili man lagi pirme mag-report. LIBOTER GANI, meaning sige’g LIBOT, kung sa atong paglibot walay internet, na dili ta maka-submit sa atong lindog, gawas pa sige pa gani ta ug libot… nangapkap pa ta sa dugang mga kasayuran.

But anyway, pasensya bitaw sa dili regular nga lindog nato. Maningkamot ta nga ma sige na ta ug report bahin sa atong nasimhotan isip LIBOTER.

xxxx

Misugot na si Pangulong Gloria Arroyo nga sementohon gyod ang mga national highways sa Surigao del Sur.

Wow! Dili na pod kaha ni PAN-OS NGA LAWAY sa kaulohan?

xxxx

Anad man god nga SAAD-SAARAN RA ang probinsya sa Surigao del Sur, sukad pa gyod na sa una… pulos saad ra ang ibahin sa Surigao del Sur.

xxxx

Bitaw, nahimuot kining atong lindog nga nasayod nga karong bag-o, misaad na gyod si Pangulong Gloria Arroyo, nga ipasemento na ang dalan nga nagsumpay sa mga munisipyo sa Surigao del Sur. Mismong si Gobernador Vicente “Baby” Pimentel, Jr. maoy nag anunsyo niini.

Aw, atong laoman nga mahitabo. Atong ipanghinaut nga matinuod na gyod kini. Mientras tanto, ang mga taga Surigao del Sur, mag-tener lang una sa mensahe para kang Presidente GMA…

PROMISE, HA?

xxxx

Dako na ra ba gyod kaayo ang hago ni Gob. Pimentel ning problema sa karsada sa Surigao del Sur. Saksi gyod ta sa taud-taud na nga pag follow-up ni Gob. Pimentel aron ma semento gyod ang tanan kadalanan sa probinsya. Ay, unsaon man gyod nga ang naunang mga lideres, ilabi na ang mga kongresista, way may nahimo aron mapadali ang pagsemento sa highway.

Siguro kung si Gob. Pimentel pa maoy congressman, NASEMENTO NA gyod ang tanan kadalanan sa lalawigan.

xxxx

Dili lang kay ang Surigao del Sur, nga teritoryo ni Pimentel, maoy gisaaran ni Gng. Arroyo nga ipa-semento.

Hasta gani ang Siargao Island nga “hangout” pod ni congressman Lalo Matugas sa Surigao del Norte gipasaligan pod nga himoon na ang circumferential road sa maong isla aron mapaspas ang turismo. Daghan pa ang gisaad sa gobernong nasyonal kang bag-ong congressman ng KAMPI man, kanhi Surigao Norte Gov. Lalo Matugas.

Sama sa Surigao del Sur, manghinaut lang gihapon ang taga Siargao, Surigao del Norte nga dili ma AMNESIA ang Malakanyang sa saad niini. Pastilan, kung mapakyas na pod…

“WAYA-WAYA” gihapon an mga Surigaonon.

xxxx

Aw, sa tibuok Caraga Region, “an mga Surigaonon gayod ang tagalong WAYA-WAYA”.

No, dili kay sa istorya ra nga ang “L” himong Y mao nga ang WALA mahimong WAYA. Bisan sa mga kalamboan, IWIT GAYOD sila. Aw, ikumpara ra god ang kahimtang sa Butuan, Agusan ang Surigao…

Haskang Layo-a Ra.

xxxx

Pananglitan… Sa Butuan City, doble-doble na ang higanteng tulay, Super Bridge pa man gain kanang arang taasa nga Magsaysay Bridge 1 ng Magsaysay Bridge 2.

Pero ang Surigao del Sur, sus, bisan ang usa ka dupa nga tulay LISOD KAAYONG SEMENTOHON.

xxxx

Aw, naa hinuoy PIRMENG NUMERO UNO ang Surigao del Sur…. NAMBER WAN kini sa kampo sa mga rebelde!

Read More...

Mi-landing sa tambalanan ang usa ka Pulis Butuan ug ang angkas niini human nadisgrasya ang motorsiklong ilang gisakyan alas 4:30 sa buntag niadtong usa ka adlaw.

Sa taho nga midangat sa rehiyonal nga buhatan sa kapolisan gikan sa Surigao City Police Station, gibutyag nga usa ka PO1 Jason Ralph Paler, nga taga Pangabugan, Butuan City samtang nagsakay sa motorsiklong Honda XRM didto sa KM. 3, Brgy. Luna, Surigao City paingon sa habagatang bahin sa siyudad, igo gyud kining midangat duol sa Helping Foundation Bldg., kalit lang misimang ang iyang gisakyan.

Didto kini mipaingon sa tuo nga bahin sa karsada ug mipingis pag-igo sa konkreto nga poste, hinungdan nga mi-crash kini sa aspaltadong dalan.

Nag-bulag sa pagpangalagpot sila si Paler ug ang iyang angkas nga giilang si Nicomedes Carlo Alalunay, taga Lipata, Surigao City.

Dali hinuong gidala ngadto sa Caraga Regional Hospital ang duha ka mga biktima. Ang motorsiklo nga naka-angkon usab ug danyos, kasamtangang gi-impound sa Surigao City Police Station.(Noel B. Najarro)

Read More...

Gisikop sa kapolisan sa General Luna Municipal Police Station ang usa ka lolo, human kini gisumbong nga milugos matud pa sa usa ka 4- anyos nga apo didto sa sa Brgy. Catangnan, General Luna, Siargao Island, Surigao del Norte.

Si Jenny (gitago ang tinuod nga ngalan ) 4- anyos molupyo sa Catangnan, General Luna, misumbong sa kapolisan inubanan sa mga paryente niini, nga gi-molestiya siya sa iyang lolo Tarsilo (gitago pod ang matuod nga pangalan).

Ang pag pang-molestiya, nahitabo niadto pang Nobyembre 4 sa alas 9:00 sa buntag, apan nalangan ang pagdangat niini sa buhatang rehiyonal sa kapolisan tungod kay gipahigayon pa sa Women and Child Concern Desk (WCCD) sa General Luna ang mainampingon nga misukit-sukit sa biktima, tungod sa kalinghod pa sa panuigon niini.

Sa asoy sa biktima ngadto sa imbestigador sa WCCD, gidapit siya sa iyang lolo ngadto sa panimaly niini, ug didto siya gi-molestiya.

Ang suspetsado gisikop gilayon sa kapolisan sa General Luna, ug gi-detene karon sa selda sa maong lungsod alang sa dugang imbestigasyon.

Giandam na ang tukma nga kaso batok sa tigulang.(Noel B. Najarro)

Read More...

IMBES MAUNDANG o mahinay, nagpadayon gihapon ang pagpanghasi sa mga kawatan sa Surigao City. Bisan adlaw’ng dako ug daghang tawo, halos wala nay kalisang ang mga kawatan nga mangbiktima sa mga Surigaonon.

Usa ka Juanita del Castillo Y Vallente, 39-anyos ang edad, usa ka empleyada sa Caraga Regional Hospital nga nagpuyo sa Riverside, M. Ortiz Street, Surigao ity, misumbong sa pulisya human siya gibiktima sa mga kawatan didto sa atbang gayod sa Panetteria, Navarro Street, Surigao City.

Sa iyang asoy, gisulti ni del Castillo nga kalit lang nawala ang iyang kolor brown nga pitaka nga iyang gibutang sulo sa Delica van nga naka-parking atbang gayon sa 4 Aces eatery sa Navarro Street.

Sa asoy sa babaye, iyang gibutyag nga kaubang nawagtang sa iyang pitaka ang mga sulod nga nag-apil sa ID sa E-card, Philhealth, CRH ID, Pawnshop receipt, bank receipt, ug kwartang cash balor 3,500.

Sumala sa ginang, samtang giparada ang sakyanan atbang lang gayod sa ilang gikan-an, kalit lang nga gitangag sa wala makit-i ug wala mailhi nga kawatan ang iyang pitaka nga gibilin sulod sa van.

Istaring na sa record sa kapulisan kining maong kaso, busa gipaabot na lang ang mamahimong aksyon sa mga pulis niini. (Airen I. Sinday)

Read More...

TINUOD GYOD diay nga daghan pa ang buotan karon nga pinoy. Usa na niini, ang usa ka pulis sakop sa Surigao City PNP nga miturn-over ngadto sa kapolisan aroin ibalik sa tag-iya ang nakit-an niyang cellphone.

Si PO3 Florence P. Pacleb, nakakita og Nokia celfone niatong alas 7:00 ang takna sa gabie didto sa Narciso-Rizal Streets, Surigao City, niadtong Nobyembre 8, 2007.

Human napunitan, gidala gilayon ni Pacleb ang maong cellphone ug giturn-over ngadto sa ‘duty investigator’ sa Surigao City PNP, mientras wala pa kini makuha sa tag-iya.

Sa pagsulat ning balita, gipaabot na lang ang pagclaim sa tag-iya sa nahisgutang butang. (Airen I. Sinday-Periodico Surigao)

Read More...

23-anyos na, pero rugby boy pa?

Mao kini ang gipasangil kang Edgar Perca Y Malibay, 23-anyos nga laborer, nga molupyo sa Purok 6, Brgy. Canlanipa, Surigao City.

Kinsa giturn-over ngadto sa pulisya human nadakpan sa usa ka peddler samtang nagsimhot-simhot matud pa ug rugby didto sa barangay Canlanipa, alas 3:30 sa hapon niadtong usa ka adlaw.

Si Malibay, matud pa sa report, nasakpan mismo nga nagsimhot-simhot sa delikadong produkto sa concerned citizen nga si Edwin Cornetes Y Eras, 27-anyos ang edad, usa ka peddler ug molupyo sa Purok 5, Brgy. Canlanipa.

Gilayong gikumpiska ni Cornetes ang rugby nga gisulod sa botelya sa Ginebra San Miguel, ug gidala ngadto sa kapolisan.

Gilayong gitanggong sa selda sa Surigao City PNP alang sa custodial investigation ang dinakpan. (Airen I. Sinday-Periodico Surigao)

Read More...

NAGPATABANG sa pulisya ang usa ka babayeng manager human kini matud pa gihasi ug gihulga sa usa ka lalaki didto sa iyang buhatan sa Rizal Street, Surigao City alas 2:30 ang takna sa hapon niadtong usa ka adlaw.

Wala na gyod makaagwanta ug midakop na sa Surigao City PNP si Ana Mae Alvarez y Brebiescias, usa ka dalagang manager sa CONPINCO-Surigao aron ireklamo ang usa ka Joselito Arlan y Salas, taga Purok 4, San Juan, Surigao City.

Daghang higayon na matud pa nga ginahasi ug ginahulga sa lalaki ang babaye, ug ang labing ulahi nga paghasi nahitabo niadtong usa ka ka adlaw.

Sumala sa imbestigasyon, kalit lang mingsulod ang suspek ngadto sa buhatan sa babaye ug gisulayan pagsagpa ug pagsipa ang biktima.

Gisulti sa manager nga sa tuhod lang siya naigo sa pagsipa sa lalaki.

Nahibaw-an nga ikatulong higayon na ang gihimong pag-atake sa lalaki niadtong usa ka adlaw.

Wala hinuon giklaro sa report, unsay rason nganong gisigehan ug hasi dayon gihulga sa lalaki ang ababye.

Wala pod gihisgotan sa pulis report nganong karon lang gisumbong sa manager ang matud pa pagpanghasi sa lalaki. (Airen I. Sinday)

Read More...

TULO ANG SAMARON, usa niini ang grabe dihang misirko ang gisakyang motorsiklo didto sa Kaskag Village, Surigao City gumikan lamang sa usa ka iro alas 2:00 sa kaadlawon niatong usa ka adlaw.

Ang mga samaron, giilang si Craig Caloy, 21-anyos ang edad, usa ka empleyado sa Gillamacs Marketing, ug molupyo sa Kaskag, Surigao City; ingon man si Ruben J. de Dios, tinun-an sa SEC nga taga Tandag City. Ug usa ka Lito Magbanua de Asis taga Pamela Street, Kaskag Village, Surigao City, nga may ‘student permit’ lang nga maoy gitaho nga nagmaneho sa sakyanan, gitaho pod nga apil sa mga nasamdan.

Matud sa report, ang nadisgrasyang sakyanan mao ang usa ka Skygo SH150 motorcycle nga may plate number MP-7240, nga gipanag-iya sa Gillamacs Marketing Corporation sa Km. 1, National Highway, Surigao City.

Sumala sa imbestigasyon, samtang nagdagan ang motorsiklo, naka-agi kini ug usa ka rough road sa rooftop area sa Kaskag. Pag-abot duol sa pinuy-anan sa mga Gonzaga, kalit lang nga mingtabok ang usa ka iro.

Nawad-an sa balanse ang sakyanan ug naglisod na sa pagkontrol ang driver, hinungdan nga mingsirko gayod kini.

Parehong nasamdan ang driver ug ang ang iyang mga angkas, apan gitaho nga nagrabehan gyod si de Dios. Gidali pagdala ngadto sa tambalanan ang mga biktima.

Gituohan nga parehong naka-inom ang driver sa motorsiklo ug ang mga angkas nga biktima.

Ang maong motorsiklo temporaryong na-impound sa City Police Station. (Airen I. Sinday/Periodico Surigao)

Read More...

Hapit madisgrasya ang usa ka eroplano sa Asian Spirit bag-uhay pa lamang tungod lamang sa usa ka iro. Matud pa sa balita nga ang eroplano sa Asian Spirit sa dihang mo landing na unta kini diha sa Surigao City Airport sa dihang may usa ka iro ang nagsuroy sa runway ug wala na malikayi sa kapitan sa eroplano diin diriyot dayon kini nga namatay.

Bag-uhay pa lamang nga gireklamo ang kadumalahan sa city airport gumikan sa matud pa daghang hukot nga mga karabaw ang naa dapit gipahiluna sa runway ug aduna usab mga iro nga nag saoy-saoy sa tunga nga bahin niini nga matud pa delikado kini sa tanan nga mga eroplano nga mo landing diha sa city airport.

Sa nakuhang interview sa usa ka radio station sa usa ka security guard didto, nasuta nga sila usab wala pa ma suwelduhi upat na ka bulan ang milabay sa ilang private security nga naka-assign diha sa maong tugpahanan mao nga sa iyang pag-tuo nag paloy-paloy na usab ang iyang mga kaubanan sa pag bantay gumikan kay walay suweldo.

Ang maong reklamo sa pagkakaron gitakdang ipadala ngadto sa Central Office sa Air Transportation Office may kalabutan na sa matud pa dili maayo nga obserbasyon diha sa mga iro sa runway nga hapit na maka-disgrasya unta sa eroplano sa Asian Spirit.

Matud pa usab nga ang Air Transportation Office sa siyudad gidumala kini sa usa ka babaye nga manager nga si Mrs. Lory Orteza, nga kahinumduman si Mayor Alfonso Casurra mipadayag usab ug pagmoyo kontra na sa kadumalahan sa ATO gumikan sa hinay niini ug langan nga pag responde sa panghitabong sunog niadtong gabii sa nakalabay nga biyernes, Nobyembre 2, 2007.

Read More...

Usa ka sunog ang miigo sa dakbayan sa Surigao kagahapon, Nobyembre 2, 2007. Sumala sa imbestigasyon gibana-banang 3 milyones ka pesos ang danyos sa maong sunog.

Ang sunog nagsugod mga alas singko y medya sa hapon didto sumala pa nanukad sa panimalay ni Brigido Guyano sa may dalan Burgos. Sumala pa sa imbestigasyon sa mga tinugyanan sa kabomberuhan nga hangtod karon gipailawom pa gihapon nila sa makuting imbestigasyon ang pag-ulbo sa kalayo. Una na niini nga naay nagbutyag nga may nagsindi ug kandila sa altar sa panimalay nila Mr. Brigido Guyano agig pagdagkut sa kalag-kalag ug didto sumala pa nagsugod ang kalayo.

Lakip sa nasunog naglakip sa mosunod, karaan nga balay ni anhing Oguing Navarro, Mr. & Mrs. Brigido Guyano, Mr. & Mrs. Yalan, Mr. & Mrs. Menesis, Mr. & Mrs. Taer, Mr. & Mrs. Harry Rovillos, Mr. & Mrs. Jose Guyano, Mr. & Mrs. Reyna, Mr. & Mrs. Fetalvero, Mr. & Mrs. Fernandez, Mr. & Mrs. Dodoy Matela, ug Mr. & Mrs. Mangyan.

Sumala sa nasayran, duha na lamang ka mga istruktura ang wala malamoy sa kalayo kini mao ang Cruzado Bldg. nga naa mahimutang sa kanto Burgos ug Borja tungod sa firewall ingon man usab ang panimalay sa mga ginikanan ni Mr. & Mrs. Boy Calejesan nga sumala pa gilibutan sa firewall.

Sa gihimong imbestigasyon ang miresponde mao ang mga tinugyanan sa kabomberuhan sa kinatibuk-ang pwersa sa Bureau of Fire Protection (BFP) sa dakbayan pinanguluhan ni City Fire Marshall Augusto Caesar Kinazo apil usab nga miresponde ang Prov’l Fire Marshall nga si Benjamin Macaraig ug ang regional office sa BFP. Miresponde usab ang mga kabomberuhan sa Placer Fire Station, Mainit Fire Station, Rescue 44 sa probinsya, Quick Action Response Team sa syudad, bombero sa Air Transportation Office ug Filipino-Chinese Fire Volunteer Brigade.

Nakontrolar ang kalayo bandang alas siete kwarenta y singko na ang takna kagabie. Sumala pa ni FO2 Bolonia ang Fire Investigator sa BFP nga hangtud karon gipailawom pa gihapon kini sa imbestigasyon ang tinubdan sa kalayo nga giingong nagsugod tungod sa upos sa kandila.

Read More...