2 Ka Lungsod Sa Siargao Gi-atake sa NPA; Pulis Samdan, Daghang Armas Gitangag

GIATAKE sa dul-an 60 ka mga armadong tawo nga gituohang sakop sa New People’s Army (NPA) ang duha ka mga lungsod sa Siargao, Surigao del Norte alas 10:30 niadtong sabado sa gabii.

Usa ka pulis ang nasamdam, ug kapin usa ka mga pusil ang natangag sa mga armado dihang ilang giatake ang istasyon sa pulis sa lungsod sa Dapa ug General Luna sa Siargao Island.

Subay sa report, ang mga armado nga naka-uniporme ug itom ug nagsakay sa unom ka mga vans maoy miatake sa munisipyo.

Ang report nagpasabot nga 20 sa 60 ka mga armado ang misulod sa Municipal Police Station diin nag-duty ang unom ka mga pulis.

Gilayong mideklara ug RAID ang mga armado dungan sa pagpahanap sa mga pulis. Pagkahuman gipangtangag sa mga armado ang unom ka mga mugbo nga armas ug tulo ka mga M-16rifles.

Giransak pod sa mga armado ang Fire Station, Water District, Public Attorney’s Office (PAO), SSS, BIR, Court ug Philhealth.

Way labot niini, giguba pod sa mga NPA ang mga computers sa Police Station ug ubang buhatan sa kagamhanan. Wala hinuoy nasamdam o namatay sa raid sa Dapa.

Apan dungan sa maog pagsulong, gisulod pod diay sa laing grupo sa mga NPA ang istasyon sa pulis sa lungsod sa General Luna.

Hinuon ang mga pulis nga gipangulohan Chief of Police didto nakahimo pa sa pagsukol, hangtud nga nalupig gyod ang ilang puwersa.

Nasamdam sa maong hitabo si PO1 William Montilla Dayday. Sa raid sa General Luna natangag pod sa NPA ang usa ka M-16 rifle ug upat ka mg agi-isyu nga armas.

Gitaho nga nanghaag pa ug mga propaganda materials ngadto sa mga tawo sa Dapa ang mga NPA. Ang maong mga propaganda, nagbatbat sa mga sentimiyento batok kang Congressman Francisco T. Matugas ug Dapa Mayor Peter Ruaya.

Ang mga cell sites ug uban pang communication facilities sa lugar, gipangguba pod sa mga NPA.

Gipalihok na hinuon ang puwersa sa pulisya ug sundalo aron gukdon ang mga NPA