Gob. Barbers mopahigayon ug dugang medical mission sa San Benito, Sta. Monica, San Isidro ug Pilar

Ubos sa programa ni Gob. Ace Barbers sa maayong panglawas, ang mga kawani sa Provincial Health Office sa pagpangulo ni Dr. Audie Relliquette, mopahigayon na usab sa laing Medical Mission aron sa paghatag ug maayong serbisyo medical sa mga lungsod sa San Benito, Sta. Monica, San Isidro ug Pilar.

Karong Hulyo 4, 2008 maoy gikatakda nga eskedyul alang sa lungsod sa San Benito didto sa ilang municipal gym, ug Sta Monica nga adto himuon ang pagpanambal sa ilang hospital. Sa Hulyo 5 mao ang lungsod sa San Isidro diin adto kini pagahimoa sa ilang municipal gym, ug ang lungsod sa Pilar sa ilang hospital.

Ubay-ubay ang pagpangandam sa taga Provincial Health Office alang na sa medical, dental, pagpanuli, laboratory examinations ug libreng mga tambal sa buot nga mopahimulos sa maong higayon.

Dako ang panghinaot ni Gob. Ace Barbers sa maong nagpadayon nga programa sa maayong panglawas sa probinsya, dako ang mahatag niini nga tabang sa mga katawhan labi na sa mga adunay mga gihambin nga mga balatian, ug nga makalikay sila sa mga sakit.

Sa laing bahin, sa susamang higayon, mouban usab ang mga kawani sa Provincial Agriculture Office aron sa pag apud-apud ug mga vegetable seeds ngadto sa mga mag-uuma sa mga nahisgutang lungsod, alang na sa Hunger Mitigation Program sa probinsya.

Gisiguro ni Gob. Barbers nga mapatuman gayud ang maong mga programa alang na sa ikausbaw sa pangita sa atong mga mag-uuma ug sa kanunay mahatagan ang mga katawhan sa saktong pagtagad ug serbisyo sa maayong panglawas. (PGO-Media Affairs Office/PIA-Surigao del Norte)