LIBOTER ni Gilbert A. Gorgonio, Sr.

PWEDE BA ‘LIS?

Kinsay nagsulti nga ang SURIGAO CITY dili pa SIYUDAD? Bali gyud mo kung mao nay inyong pagtuo. Sayop kayo na’ng dako.

Ang Surigao sama ra sa Butuan City, Tagum City, Davao City ug uban pang City sa Mindanao ---- USO ANG KAWAT UG RANSAK!

xxxx

Uy!!! Congrats sa Surigao City PNP. May bag-o na daw diay mo’g trabaho? Korek…STATISTIIAN na daw ang PUlis Surigao ---- Sige lang ug RECORD SA KASO SA RANSAK!

xxxx

Bitaw, matud sa sumbong nga naka-abot sa PERIODICO SURIGAO, grabe na gajud kuno an pagsiaw nan RANSAK, KAWAT ug susamang krimen sa Surigao City. Mora daw ug wa nay gitamod ang mga kawatan. Kana ba’ng WALA NA DAW HALOS girespeto. Sabagay, wa man gyoy respeto ang kawatan di ba?

Pero, BALE-WALA na gyud daw sa mga kawatan ang Pulis. Unsa gain meaning sa POLICE VISIBILITY?

xxxx

Bisan gani daw ang mga dagkong tindahan, opisina, ug hospital gi-ransak na sa mga kawatan. Pero ang nakaparat, kay bisan ang balay sa pobre ug halos “way diyos” nga mapunit, giapil na pod ug harbat sa mga balhinuon ug kamot.

Basin gani daw ug WALA MAKA-ILA unsay Pulis ang kawatan sa Surigao. Otherwise, medyo magduha-duha pa sila sa pagpangawat…

xxxx

Pero matud sa akong amigong batan-on sa Surigao City, “Kuan man god Sir, lisod man god karajaw kuman an panahon…. Amo tingali na nauso ang kawat.”

Bitaw sad. Pero tungod ba kay lisod ang panahon, pasagdan nalang nato nga magpadayon ang ransack, ug uban pang matang sa kawat?

Wa na bay mahimong epektibong lakang ang atong gobyerno? Mayor Pons, duna pa bay nahabilin dinhang paagi aron molihok ang mga sulugoon sa balaod? Palihug kuno ‘Lis, pakit-a ug epektibong sampol ang katawhan sa inyong ANTI-CRIME DRIVE. Pwede ba ‘Lis?