NEGOSYANTE SA CANTILAN GIPADAKOP SA TAGA GATEWAY

GITANGGONG GYOD sa buhatan sa Pulisya ang usa ka nagpailang negosyante sa Cantilan, Surigao del Sur human kini gidudahan didto sa Gateway Hotel, sa barangay Luna, Surigao City.

Alas 4:00 ang takna sa hapon niadtong usa ka adlaw, Hunyo 17, 2007.

Ang record sa Surigao City PNP nagtug-an nga usa ka Gerry Larase y Andoy, 42-anyos ang edad, minyo, manager sa gateway Hotel, nga taga Bernadette Village, Brgy. Luna, Surigao City nagpasaka ug reklamo sa pulisyabatok sa usa ka Eric Ferdinand Yu Melasa, 28-anyos ang edad, minyo, nagpailang negosyante sa Cantilan, Surigao del Sur tungod sa matud pa “kadudahang lihok.”

Sumala sa report, ang gireklamong si Eric Melasa, misulod lang ug kalit sa Gateway Hotel, particular didto sa Checkpoint sa Barangay Luna, Surigao City, ug misaka pa gyod sa hotel bisan kung dili kini usa ka guest (wala magcheck in) sa naasoy’ng hotel.

Si Melasa, matud sa sumbong sa taga gateway nangita kunohay sa iyang amigo nga giilang si Mark Besañes nga matud pa nagcheck-in sa room # 211.

Misamot ang katingala sa taga Gateway, kay sa ilang pagsusi, walay nagcheck-in nga Mark Besañes, sa gibutyag nga Room # 211.

Way labot niini, matud sa reklamo sa manager, si Melasa mideretso pa gyod sa third floor sa hotel ug gikuha ang usa ka bag sa ilang guest. Suwerte hinuon kay nasakpan kini sa tinuod nga tag-iya.

Gibutyag pod nga ang nagpailang negosyante, misulay pa gyod pagpangabli sa ubang kuwarto sa hotel hinungdan nga mireklamo ang okupante sa room # 255.

Gitanggong gyod sa buhatan sa kapulisan ang nagpailang negosyante, apan paglabay sa piipila ka takna gibuhian ra usab sa mga pulis. (Jodian Jayme/Periodioco Surigao)