Sa Canlanipa: 50-Anyos Patay sa Dunggab

NAMATAY DIHA-DIHA ang usa ka 50-anyos nga laborer human kini giunay sa pagdunggab sa yang kauban sa inom didto sa Purok 6, Baranggay Canlanipa, Surigao City, alas 7:30 sa gabie niadtong Hunyo 24, 2007.

Matud sa pulis report, ang biktima mao si Romeo Locredo y Migullas, 50-anyos ang edad, minyo ug usa ka construction worker, nga taga Purok 6, Barangay Canlanipa, Surigao City.

Nakaangkon kini ug nagsolong samad dinunggaban sa iyang walang dughan.

Usa ka Roger Cambaya y Villamor, ulitawo ug walay trabaho ang gitudlong suspek sa hitabo.

Sa imbestigasyon gibutyag nga usa ka tawag sa telepono ang nadawat. Sa mga awtoridad, ug dihang ilang gisusi ang giingong kaso sa pagpanunggab, wala na didto ang suspek.

Nahibaw-an nga ang biktima u gang suspek, nag-inom sulod sa balay ni Cambaya.

Matud ni Roque Maquiling, silingan sa biktima, nadunggan nila nga nagkainitay ang istorya sa suspek ug sa biktima, apan pagkataud-taod mikalit ug kahilom nga nakapaduada sa mga silingan.

Gilayong gipasusi sa usa Brendo Cosep, 32-anyos, minyo ug molupyo usab sa maong lugar, ang nahimutangan sa biktima ug suspek, ug mao na lay ilang nakit-an ang nagbuy-od nga lawas sa biktima.

Gidali sa pagdala sa mga silingan ngadto sa Caraga Regional Hospital ang biktima, apan pag-abot didto gideklara kini sa mga doctor nga patay na.

Matud sa pulisya, nakasibat dayon ang suspek human sa hitabo.

Gipalihok na karon ang mga pulis aron dakpon ang suspek. (Jodian Jayme/Periodico Surigao)