Sa Caraga Region: 3 Ka Pulis Taktak sa Serbisyo Tungod sa Tinunto sa Eligibility

Caraga Region (June 19) - TULO GYOD ka mga pulis ang gitaktak sa serbisyo tungod sa tinonto sa eligibility ug ilang mga educational attainment, apil na ang paggamit ug peke nga diploma.

Sa impormasyon nga gipagawas sa Police Regional Office XIII kagahapon sa buntag nga pirmado ni RHQ Chief Information Officer, P/Senior Inspector Nelly Villagarcia, gibutyag nga human sa hingpit nga deliberasyon sa Civil Service Commission gikan sa tuig 2006 hangtud karon, nakaplagan nga si PO1 Manuelito A. Orillaneda gitang-tang gikan sa serbisyo sa PNP service subay usab sa Special Order No. 1255, nga penetsahan ug Nobyembre 14, 2006 tungod sa iregularidad sa iyang eligibility.

Gipalagpot pod sa iyang puwesto si PO1 Pio P. Mapalo, base sa Special Order 448 nga penetsahan ug Abril 2, 2007 gumikan sa kapakyas niini sa pagtuman sa gikinahanglan nga Collge Units, samtang si PO1 Samuel T. Tubo, giterminate usab sa susamang rason.

Subay niini, laing 11 pa ka mga personahe sa Police Regional Office XIII nga adunay mga pending nga mga kaso tungod sa irregularidad sa ilahang mga Transcript of Records (TOR).

Gimando usab sa CSC ang pagbawi sa mga promotional appointments nila ni SPO2 Mario B. Portillano, SPO1 Edwin B. Urbiztondo, SPO1 Arlington B. Martinez, SPO1 Hilario L. Nazi, PO3 Andres M. Bariquit, PO3 Alex M. Autor, PO2 Amado Clifford B. Garma, PO2 Rene D. Pulido, PO2 Copernail B. Loayan, PO2 Robert S. Maglasang ug PO1 Rogelio E. Dollatan.

Samtang sila si PO2 Elpedio P. Palanog ug PO3 Felix B. Maquiling gisuspende pod tungod sa gihapon sa “tinonto” sa ilang mga transcript of records. Si PO2 Albert A. Valera ang na-exonerate sa samang kaso.

Matud ni Caraga PNP Director Antonio Nañas, dili gyod pasagdan sa iyang kamandoan ang maong mga iregularidad sa organisasyon sa PNP.

Kadtong makaplagang mga nakalapas pasakaan ug Administratibo o Criminal Sanction matud ni Nañas.

Tungod ning nadiskubreng “hokus-pokus” sa mga rekisitos sa pagka-pulis, gitumbok ni Nañas nga mas higpitan nila karon ang pagsusi sa mga dokumento sa recruitment processs aron malikayan ang susamang mga hitabo sa umaabot. (Noel B. Najarro/Periodico Butuan)