SA SURIGAO CITY: KAWAT DIDTO, KAWAT DIRI

MISAMOT GYOD ang pagdagsang karon sa kasong kawat sa Surigao City. Giila na gani kini ug KAWAT DIDTO, KAWAT DIRI, tungod kay luyo-luyo na ang report sa mga panghitabo, matud sa balita nakaabot sa PERIODICO SURIGAO.

Kagahapon, gilampurnas gyod sa wala mailhing kawatan ang mga kwarta, cellphones ug uban pang mga gamit sa mga estudyante sulod sa usa ka boarding house sa Narciso Street likod sa St. Jude Thaddeus Institute Technology (SJTIT), Barangay Taft, Surigao City kaadlawon kagahapon.

Ang mga biktima, giilang sila si Melanie Turtur, 17 anyos, nawad-an ug usa ka cellphone Nokia 1110 cel # 09105663236 nga nagkantidad ug P2,500.00; Marjorie Ruaya, 20-anyos, estudyante sa Philippine Women’s University, lumad nga taga Purok 1, Barangay Cawilan, Tagana-an, Surigao del Norte usa ka cellphone Nokia 2100 cel # 09195744120; Mary Grace Aseniero, 16 anyos, estudyante sa SJTIT, lumad nga taga-Tandag, Surigao del Sur nga nawad-an ug cellphone Nokia 8250 ug Jeanette Bellingan, 16 anyos, usa ka bisita ni Mary Grace nga taga Tandag gihapon ug nawad-an usab ug cellphone.

Sumala sa imbestigasyon, ang kawatan miskreto lang pagsulod sa boarding house bandang alas 2:00-3:00 sa kaadlawon agi sa kisame.

Human nakakawat, ang suspek, didto na miagi sa main door sa paggawas. (Jodian Jayme/Periodico Surigao)