1,000 KA FORESTERS NAGTAGBO SA BUTUAN

Mokabat sa usa ka libo ka mga foresters nga nagagikan sa nagkadaiyang dakbayan sa nasud ang nagtigum sa dakbayan sa Butuan sugod karong adlawa.

Ang kalihukan tipik sa kasaulogan sa ika 59^th Foundation sa Society of Filipinos Foresters, ubos sa temang “Onward Forester: Mitigate the Climate Change.” Ang panagtagbo, gibuksan pinaagi sa pagpananom sa semilya sa kahoy nga Mahogany sa daplin sa kadalanan sa Brgy. Manapa, Buenavista, Agusan del Norte.

Si kanhe DENR Undersecretary nga si Renato De Rueda, kinsa maoy pangulo sa kapunongan, nagtug-an sa mga tigbalita nga usa sa dako nilang pagabuhaton mao ang pagmugna ug usa ka resolusyon nga motabang sa pag mitigate sa gitawag nga “Global Warming”

Kining maong resolusyon, ipadala ngadto kang DENR Secretary Angelo Reyes, nga maoy nangulo sa Presidential Task Force on Climate Change.

Gisulti ni De Rueda nga ang ilang pagpananom ug kahoy kagahapon, mao usab ang ilang tampo sa programa sa DENR Secretary ug sa pangulo sa nasud nga mao ang pagtanom ug 23 hangtud 25 milyones ka mga kahoy, ubos sa gitawag ug “ Tree of Life” programa hangtud na sa tuig 2010.