NO. 7 MOST WANTED SA SURIGAO NORTE NADAKPAN NA  

Nasikop na gyod ang giilang ika-pito nga Most Wanted Person sa lalawigan sa Surigao del Norte.

Si Edgar Millapes, Alyas Dodong Lagat, way trabaho nga molupyo sa Barangay Matin-ao, Mainit, Surigao del Norte gidakop sa mga sakop sa Surigao del Norte Intelligence Section, Mainit PNP ug Surigao Norte Provincial Mobile Group alas 2:30 sa hapon niadtong Hunyo 29 samtang gitambalan kini sulod sa Caraga Regional Hospital.

Ang pagdakop kang Dodong Lagat, gihimo subay sa Warrant of Arrest nga giluwatan ni Judge Louis P. Acosta, presiding judge, RTC BR 22, 10th Judicial Region, Surigao City tungod sa kasong attempted murder ubos sa CC No. 7521.

P120,000.00 ang piyansa nga gitakda alang sa temporaryong kagawasan sa akusado.

Nasayran sa report nga nasulod sa hospital si alyas Lagat tungod sa usa ka samad pinusilan nga iyang naangkon niadtong gabie sa Hunyo 27 didto sa Barangay Cantatoy, Malimono, Surigao del Norte.

Gibutyag sa balita nga ang dinakpan, mao ang ikapito nga Most Wanted Person sa lalawigan sa Surigao del Norte, particular na sa lungsod sa Mainit.

Giturn-over gilayon ang dinakpan ngadto sa korte nga mimando pod nga i-komitir na kini ngadto sa Surigao del Norte Provincial Jail. (Periodico Surigao)

AddThis Social Bookmark Button

0 comments

Post a Comment