Sa MAINIT: BILAS GIDUNGGAB SA BAYAW, PATAY

Patay ang usa ka 38-anyos nga bilas human kini gidunggab sa iyang bayaw didto sa Brgy. Roxas, Mainit, Surigao del Norte alas 11:30 ang takna niadtong gabie.

Ang Mainit Municipal Police Station, miila sa biktima nag mao si Carlita Tacuba 38-anyos, molupyo sa Roxas, Mainit.

Sa imbestigasyon sa kapolisan nasayran nga si Tacuba, gikalalis sa bayaw niini nga si Arnold Medrian y Paramao, 34-anyos kinsa hubog niadtong higayona, tungod sa problemang pangpamilya.

Nasayran usab sa kapolisan ang duha ka mga pamilya nag-ipon ra sa usa ka panimalay.

Sumala sa imbestigasyon sa kapolisan, ang biktima maoy miuna sa pagdunggab sa suspetsado, ginamit ang “sayad” (gamit sa pangsaggot) nga miigo sa tuo nga dughan ug sa wala nga nawong sa lalaki. Mibalos ang suspetsado sa pagdunggab sa biktima hangtud nga kini namatay.

Ang suspetsado gipatambalan pa karon sa Caraga Regional hospital ug giandam na ang kaso batok kaniya sa iyang pagawas. (Noel Najarro/Periodico Butuan)