SURIGAONON KILLER MIATAKE NA POD: Mag-uuma Buak Ulo sa Alegria

BUAK ANG ULO sa usa ka biktima, human mi-atake ang wala mailhing Surigaonon killer (tigpangbiktima ug Surigaonon) didto sa Purok 6, Barangay Ouano, Alegria, Surigao del Norte niadtong miaging gabie.

Matud sa pulis report, ang biktima giilang si Benigno Malbacias, 67-anyos ang edad, mag-uuma ug minyo nga molupyo sa Purok 2, Brgy. Camp Edwards, Alegria. Sumala sa Pulis report, si kapitan Ruben Caumpay sa Brgy Ouano uban sa iyang Barangay Pulis Laban sa Krimen maoy mireport sa gidangatan sa mag-uuma ngadto sa Alegria PNP.

Sa imbestigasyon nasayran nga ang killer migamit ug 9MM caliber pistol. Gisulti sa report nga samtang nakig-inom ang biktima uban sa iyang mga higala didto sa usa ka sari-sari store, kalit lang nga ming-abot ang wala mailhing killer ug wala nay daghanglangas, gipabuthan dayon ang biktima, hinungdan nga nabuak gyud ang ulo niini.

Human sa pagpamusil, paspas nga mingsibat ang suspek paingon sa wala matino ang lugar. Narekober gikan sa nahitaboan ang usa ka basiyong balas a 9MM pistol.

Gipaspasan na karon sa Alegria PNP ang ilang imbestigasyon aron sa pagsubay kinsa gayud ang SURIGAONON KILLER ug unsa usab ang motibo niini sa pagpamusil ug mga molupyo sa Surigao del Norte. (Periodico Surigao)