Sekyu Giilogan ug Pusil sa Pulis-kuno

LUPIG PAY NANIKOP. Gikuha sa tumang kasayon sa usa ka wa mailhing tawo ang pusil sa usa ka 34-anyos nga sekyu, pinaagi lang sa pagsulti nga “USA AKO KA PULIS.”

Si Monchito Salibia, 34 anyos ang edad, minyo, Security Guard nga nadestino sa Valencia Nickel Mining ug molupyo sa Purok Santan, Espina Extension, Brgy. Taft, Surigao City nagsumbong sa kapulisan nga giembargohan siya ug armas sa wala mailhing tawo.

Sumala sa biktima, iyang giubanan ang ilang chiefmate sa Valencia motor padulong sa Blue Heaven sa Borromeo Street, dihang kalit lang nga may miduol kaniya ug nagpaila nga usa ka police officer. Human sa pagpaila, giembargo dayon ang armas sa sekyu nga kalibre .38 sam protector nga may serial number 10971722 uban ang unom ka wala pa makabuto ngamga bala.

Dungan sa pagkuha sa pusil, ang nagpailang PULIS KUNO mitugon pa sa sekyu nga mosunod siya sa police station, apan nagduda ang biktima. Gipangutana niya ang floor manager kung nakaila ba siya sa nagpaila nga police officer, apan gitubag lang siya nga kadtong maong tawo miyembro sa CIDG. Ang biktima wala mosunod sa pulis estasyon ug iya nalang gitawagan ang ilang security agency para ipahibalo ang nahitabo sa iyang armas. Nagapadayon pa ang imbestigasyon hangtod karon. (Jodian Jayme/Periodico Surigao)