Kapin Libo Ka Pasyente Nakapahimulos sa Medical Mission

Mikabat sa 1069 ka mga pasyente ang nakapahimulos sa medical, dental outreach ni Surigao del Norte Gov. Robert Ace Barbers ug sa grupong Abante Surigao kagahapon, (miyerkules) Septembre 26 didto sa lungsod sa Gen. Luna.

Ang maong misyon gikuyogan sa mga dentista ug doktor sa Provincial Health Office sa Surigao del Norte.

Ang medical mission, tipik sa gihapon sa gipahigayong ika-trese nga Surfing Competition sa Gen. Luna.

Ang medical ug dental outreach gihimo didto sa Boulevard diin adunay 99 ka pasyente ang naibtan ug ngipon, 721 ka mga pasyente ang nahatagan ug libreng konsultasyon, 51 ka mga bata ang natuli, 20 ang gitanyagan ug libreng paps smear, 49 ang nakapahimulos sa random blood sugar, 9 sa cbc, 67 ang sa urinalysis, 5 sa platelet count ug 48 sa hemoglobin determination.

Ang medical team sa PHO gipangulohan ni Dr. Audie Relliquette. Mihatag usab sa ilang kooperasyon ang mga tinugyanan sa maayong panglawas didto sa maong lungsod. Nagpakita ug suporta ang Mayor sa Gen. Luna nga si Mayor Espejon.

Bisan sa kadaghan sa mga tawo, wala kini makabalda sa mga dentista ug sa mga doctors pag-atiman sa ilang mga pasyente.

Gipahayag ni Barbers nga ang medical mission usa sa mga agenda nga iyang gihan-ay , isip suporta sa programa sa panglawas sa sa probinsya ug iyang gipasalig nga kini magpadayon. (Fryan E. Abkilan)