Pulis Surigao Naka-Iskor Na Usab; Kinawat Nauli, 3 Suspek Sikop  

SUNOD-SUNOD na karong semanaha ang iskor sa Pulis Surigao batok sa badlungon nga sakop sa katilingban.

Ang malampusong pagsumpo sa gipausong isnats cellphone sa Terminal sa dakbayan sa Surigao, positibo pod nga nahatagan ug hustisya sa mga sakop sa Surigao City PNP ang nahitabong kawat-bag sa Borromeo Street sa Baraangay Taft, Surigao City kagahapon.

Sumala sa pulis report, usa ka Antonieta Martinez Sima, 39-anyos ang edad, usa ka negosyanteng taga Purok Grapes, Brgy. Silang, Tago, Surigao del Sur ang nagpatabang sa Pulis Surigao human nadiskubrehan nga gikawat ang iyang brown bag (Paris brand) nga may sulod nga mahinungdanon ug mahalong butang didto sa iyang gi-arkilahan nga balay sa Borromeo Street.

Sumala sa pasiunang imbestigasyon, bandang alas 11:00 sa gabie niadtong Septembre 6, 2007, ang biktima kuyog sa iyang anak nga si Edgar Anthony didto lang sa ilang balay.

Wala madugay, ang biktimag uban pang paryente, nakahukom nga mangadto sa karnabal sa Boulevard, Surigao City.

Wala madugay, nadiskubrehan na lang sa babaye nga nawala na ang iyang bag ug maoy iyang gituohan nga mikuha ang usa ka batan-on nga didto sa palibot.

Gilayon naghimo ug follow-up operations ang mga sakop sa Theft and Robbery Unit sa Surigao City PNP ug pagka-alas 2:00 sa kaadlawon kagahapon, September 7, 2007, narekober ang bag sa biktima didto na sa VALTE FUNERAL SERVICES, sa Borromeo Street, Barangay Taft, Surigao City gihapon. Ang bag gibutang tapad sa usa ka sakyanan.

Ang narekober nga bag may sulod nga cash balor P1,591.25; bracelet Chinese gold shell 21K balor P9,000.00; usa ka bracelet Chinese gold ribbon 21K nga kantidad ug P8,000.00; usa ka kuwintas nga Saudi gold (mary21K) balor P12,000.00 ug usa ka relo de pulso, nga Swiss gold nga nagkantidad ug P19,000.

Narekober pod ang usa ka set sa ariyos (gold 18K) nagkantidad ug P9,000; usa ka steel tape (70.00), planax medicine, bibliya, key chain ug uban pang papeles.

Gawas nga narekober ang mga kinawat, naaresto usab ang usa ka menor de edad didto sa Punta Bilang-bilang, nga giilang si alyas MENIL nga nakuhaan usab sa usa ka gold necklace 21K ug gold necklace 18K; ug cash nga P4,860.

Pagka-alas 3:00 sa kaadlawon, laing suspek na usab ang giilang si CHRISTOPHER SALAZAR ACLO, 18-anyos ang edad, taga Purok Kalachuchi, P. Reyes Street, Brgy. Taft, Surigao City diin narekober usab gikan kaniya ang usa ka cellphone N3315 nga walay cover; P500.00 cash ug usa ka botelyang rugby.

Wa madugay, nadakpan pod si alyas Espil, taga Purok Kalachichi, P. Reyes SDtreet gihapon diin narekober pod sa iyang posesyon ang usa ka motorolla cellphone kolor itom ug cash P3,000.00.

Pulos gibutang sa kustodiya sa pulisya ang mga dinakpan. (J. Jayme)

AddThis Social Bookmark Button

0 comments

Post a Comment