Gituohang Gi-Dinamita 300 Kilos Nga Langog Gisakmit

300 KILOS gyud sa mahalong isdang langog ang gisakmit sa mga awtoridad human naapsan ang kigargahang sakyanan niini didto sa Tondo, barangayWashington, Surigao City alas 4:20 ang takna sa hapon niadtong miaging semana.

Sumala sa pulis report, unang nagpahibalo sa pulisya sa Brgy. Captain Josemedy G. Aborque sa Brgy. Lipata, Surigao City diin gitug-an nga may pumpboat gikan sa Sitio Sumilom, Brgy. Lipata, Surigao City ang kargado sa mga isdang nakuha pinaagi sa dinamita nga nagpaingon sa Tondo, barabgay Washington.

Tuod man sa pagsusi sa Special Operation Team sa Regional Maritime Office 13 uban ni Purok Chairman Mario Lavastida sa Purok 7, Sityo Sumilom, Brgy. Lipata, Surigao City, nasakpan gyod ang walay rehistro nga pumpboat nga giingon kargado ug mga isdang gi-dinamita.

Aron sa pagsiguro nga ang mga isda nakuha gyod pinaagi sa dinamita, gipa-eksamin kini kang Cityc Fish Examiner VIC A. GALVADORES nga positibong mikumpirma nga gi-dinamita gyod ang nasakpang mga isdang langog.

Tungod niini, gidala sa mga awtoridad ngadto sa pulisya sila si SILVESTRE M. HIGAYION, 46-anyos ang edad, taga Sitio Sumilom, brgy. Lipata, Surigao City ang giingong tag-iya sa girentahan nga pumpboat JERRY L. URABA, taga barangay Balibayon, Surigao City, ug URLAN E. MABULIS, taga Barangay Balibayon, Surigao City.

Ang gibana-banang 300 kilos nga mga isdang langog gipahatag ngadto sa Crisis Center for Women and Children; Surigao Norte Provincial Jail ug sa Surigao City Custodian Cell.

Ang mga gidakop, gibutang sa kustodiya ni barangay Captain Josemedy G. Aborque. Giandam na ang papeles alang sa pagsaka ug tugmang kaso batok sa mg dinakpan. (Jodian Jayme / Periodico Vismin News Network- Surigao del Norte)