3 Ka Taga Dinagat Natabonan Sa Minahan

TULO GYOD KA MGA TAGA DINAGAT ang natabonan human nahugmak ang laing tunnel sa Australia Minning Corporation didto sa Mt. Diwata, Monkayo, Compostela Valley Province alas 3:00 ang takna sa hapon niadtong usa ka adlaw.

Kining maong report, kagahapon lang hinuon nabaniog tungod kay matud ni barangay captain Franco Tito, usa ka abandonado nga tunnel nga gi-bawal na ang pag-mina maoy nahugmak. Sa report nga nahiabot sa Provincial Information Office sa ComVal Capitol, giila ang mga natabonan nga sila si JULIE SALUPAN, 35-anyos ang edad, taga SAN JOSE, Dinagat Province (kaniadto sakop sa Surigao del Norte); GENERITO SALUPAN, 32-anyos ang edad, taga San Jose, Dinagat Province gihapon. Gilayong gilusad sa gobyerno sa Mount Diwalwal ang rescue operations uban usab sa pagbulig sa lain-laing ahensiya sa kagamhanan, apil na ang provincial capitol aron masalbar ang tulo la mga Surigaonon.

Sa ulahing report nga nahiabot sa PERIODICO kagabii, gibutyag mismo ni Kapitan Franco Tito nga nakalotan na og na rescue NGA BUHI ang duha sa tulo ka mga biktima. Sa pakighinabi, gisulti ni Kapitan Tito nga na-rescue nilang buhi ang magsoong si Julie Salupan, ug Generito Salupan, samtang ang laing taga Dinagat nga si Fermin Piquero, hangtud kagahapon wala pa igkita. (Ben Catisay / Iskolar – Periodico Vismin News Network- Comval Province)