Sa Mainit: Akusado sa Rape Sikop

NADAKPAN NA GYOD ang usa ka lalaking wanted tungod sa kasong rape, atol sa gilunsad nga police operations didto sa barangay Magsaysay, Mainit, Surigao del Norte alas 9:00 sa buntag niadtong usa ka adlaw, Disyembre 10.

Mao kini unod sa report sa Mainit PNP ngadto sa Surigao del Norte PPO, nga nag-ila sa dinakpan nga mao ang usa ka Ronie Artigo Y Libarnes, 21-anyos nga molupyo sa Purok Camia, Magsaysay.

Matud sa report, malampusong naaresto ni PO1 AC GULDE, ang akusadong si Artigo didto sa Magsaysay.

Ang pag-aresto kang Artigo subay pod sa orden de aresto nga giluwatan ni Judge Victor A. Canoy sa RTC Br 29, nga penetsahan ug Nov. 14, 2007 ubos sa Criminal Case number 7816 tungod sa kasong rape.

Human sa pagkaaresto, ang dinakpan gidala dayon ngadto sa selda sa Mainit PNP, diin kini temporaryong gitanggong.

Gitakdang ipresentar ang dinakpan ngadto sa huwes nga nagmando sa pag-aresto kaniya. (Airen I. Sinday)