In My Lantawan ni Willy Evangelio 

Ang organisadong League of Cities sa tibuok Pilipinas misupak nga ang Tandag mahimong siyudad, sa rason nga mawala kanila ang P3milyones kada tuig isip deduction sa ilang madawat nga Internal Revenue Allotment (IRA).

Mao kini ang gihunghong kanako karong bag-o ni Mayor Ayek Pimentel. Ang gimahayan ni Mayor Ayek matod niya, mao ang City Officials sa Surigao City tungod kay miapil usab diay sila pagsupak aron mapugngan ang Tandag pagkasiyudad.

Pastilan, bisan ang igsuong siyudad sa Caraga Region, mao pay misupak sa kalamboan sa iyang silingan!

Dili tingali gusto sa mga Surigaonon nga makaapas ang Tandag City sa Surigao City. Ah, kagrabe sab! Bisag unsaon pa, di na man gyud hinuon makaapas ang Tandag sa Surigao City. Pero dili kakompiyansahan, basin mamilagro.

Apan ang ato unta nga malipay ang taga Surigao City nga adunay manghod nila nga siyudad sa Caraga Region nga mao ang Bislig City ug ang Tandag City, nga unta matabangan sa kalamboan. Ugaling kay di man lagi magparehas ang batasan sa mga opisyales.

Dunay mga nangatungdanan sa mga siyudad nga dili na molingi sa kauban nilang lungsod o siyudad. Palabihon nila ang kadalo sa kalambuan imbes nga motabang.

Ang pagka way lami pa gyud paminawon mao nga bisan ang Tandag nakakompleto na sa tanang requirements sa pagkasiyudad, mao pay pagsumiter sa League of Cities sa ilang complaint.

Duna usab hinoon silay rason tungod kay makubsan man lagi sila’g P3M ug para nila, dako na kini nga pagmenos sa ilang panudlanan.

Apan bisan pa niini, tungod kay tapos naman unta matuman sa Tandag City ang mga rekisitos sa pagkasiyudad, mohunong na unta sila sa pagdumbol ug magsabot nalang sa kalambuan sa tanan!

Read More...

SIKOP GYOD ang usa ka lalaking gisuspetsahang nangawat, human nasakpa didto mismo sa atop sa usa ka balay didto sa Burgos-Gonzales Streets, Barangay Washington, Surigao City alas 3:00 sa kaadlawon kagahapon.

Giila sa pulis report ang dinakpang suspek nga mao si Danilo Domagtoy y de Castro, 32-anyos ang edad, ulitawo, usa ka panday ug lumad nga taga barangay Mabini, Pilar, Surigao del Norte nga kasamtangang nanimuyo sa Purok Goding, Nueva Extension, Surigao City.

Sumala sa pulis report, si Domagtoy gi-turnover na ngadto sa Pulis Surigao sa usa ka PO3 Arnulfo Sinday Villanueva, Jr., usa ka sakop sa Palcer Municipal Police Station nga nagpuyo sa Burgos cor Gonzales Streets, Brgy. Washington, Surigao City.

Sumala sa imbestigasyon, ang suspek nadakpan gyod sa akto nga nagdala-dala ug 13-pulgadas nga BAYONETA, didto mismo sa taas sa atop sa balay ni PO3 Villanueva. Gituohang mangawat pod niatong tungora ang dinakpan.

Si Domagtoy gipasanginlan pod nga maoy suspek sa nanghitabong kasong kawat sa maong lugar.

Temporaryong gitanggong ang dinakpan sa selda sa Pulis Surigao samtang gihimo pa ang dugang imbestigasyon ning maong kaso. (J. Jayme)

Read More...

IMBES NAG-CHECK IN aron makalingkawas sa mga dautan, nahitumpawak na hinuon sa kawatan.

Mao kini gidangatan ni Sarita Dipatuan, 23-anyos nga babayeng negosyanteng taga Zamora Street, Brgy. 9, Dapa, Surigao del Norte, kinsa ‘gi-upawan gyod’ sa iyang mga kagamitan samtang nagcheck-in sa usa ka lodging house sa Surigao City.

Sa iyang asoy gisulti sa ginang, nga nag-check in siya sa BJML Lodge, niadtong usa ka adlaw.

Pagka alas 4:30 sa kahapunon migawas siya makadiyot kay mang-snack. Pero pagbalik niya sa kuwarto diin siya nag-estar, upaw na o sinaw na ang iyang mga kagamitan.

Apil sa mga nangawala ang 25 ka mga Sunves shorts (assorted colors) balor P4,000; usa ka dosena nga bakos balor P540; duha ka dosena nga brief balor P1,000; walo ka buok kalo nga kantidad ug P800; tulo ka cartoon lighter nga kantidad ug P255 ug usa ka Hanes balor P280.

Gisulti sa ginang nga sa iyang paggawas ang iyang kuwarto giserhan gyod ug maayo kini gamit ang ‘padlock’ nga gipanag-iya sa lodging house.

Wala pay report bahin sa reaksyon sa lodging house ning maong kaso. (J. Jayme)

Read More...

Pangutana lang noy… ni: TAN-TAN GORGONIO

GIBANHAW na usab karon sa senado pinaagi ni Sen. Panfilo Lacson ang imbestigasyon sa kontrobersyal nga “hello, Garci”… apan, pangutana sa katawhan madutlan na kaha karong higayona ang pamuno nasod?

Matud sa balita, gibuhi ang maong imbestigasyon tungod usab dunay bag-ong mga ebidensya ang gibutyag sa usa pa ka kontrobersyal nga ISAFP agent nga si Sgt. Vidal Doble.

Ang pangutana – asa man ning mga ebidensyaha sa una? Nganong karon paman kini gipagawas nga dugay na mang nahitabo ang maong kontrobersya? Gani, sa kainit paman sa presidential elections niadtong tuig 2004, gisugdan pagyagyag kining maong istorya?

Mao hinuon nakapangutana ang kadaghanan nga basin usa nasab kini ka klarong pag-usik ug panahon sa way klarong imbestigasyon.

Ngano man? Aber… karon pa gain abtki na kayo ang gobyerno sa pagpanagang. Kini pinaagi usab sa pagbanhaw sa Executive Order 464 o EO 464.

Pangutana! Unsa man gyud kining EO 464 nganong kada dunay imbestigasyon sa kongreso o sa senado ipauso man dayon kini?

May gitago gyod kahang tinonto sa eleksyon ang Malakanyang nga hadlok man jug utingkayon?

Gani kining ehekutibo nga order daw gihimo na nga usa ka sagang sa mga opisyales sa gobyerno kada imbestigasyon sa kongreso.

Apan ngano, mamugos man gyud ang mga magbabalaod sa pagpatawag ug paghimo ug imbestigasyon labot sa mga opisyales sa gobyerno kung kining tanan mauli ra gihapon saw ala, pi9naagi niining Executive Order?

Pastilan, nagpareha ra baya ni… ang mga pro ug oposisyon sa gobyerno. Tabla ra ug hilig—PAG-USIK-USIK SA SALAPI UP PANAHON SA MGA PILIPINHON.

Wa ba sila masayod nga ang pag-usik-usik sa rekursos sa mga Pilipinhon, buhat kana nga PAGPABAGA SA NAWONG?

Aw, sabagay… BAGA NA MAN TUOD… Dili na hidutlan.

Read More...

WAGTANG ang tanang gamit ug salapi sa usa ka seaman nga nagcheck-in uban ang usa ka babaye sa usa sa mga lodging houses sa P. Reyes, Barangay Taft, SurigaoCity kaadlawon sa miaging adlaw.

Usa ka Mario Detoyato, minyo, usa ka seaman nga taga Zamboanga, misumbong sa pulis nga nawad-an siya sa iyang cash nga P500 cash ug usa ka N1100 cellular phone.

Sumala sa pasiunang imbestigasyon, ang biktima gikahibagat ug usa ka babaye sa GEALI’s Videoke Bar dayon ngadto sa laing videoke bar atubangan sa gate sa PPA.

Apan pag-abot sa alas 3:00 sa kaadlawon, micheck-in sila sa Cuizon Lodge sa P. Reyes, Brgy. Taft, Surigao City.

Pagka-kaadlawon na, nahigmata ang lalaki, apan sa paglingi pa niya wala na didto ang kaubanan niyang babaye hasta na pod ang iyang kuwarta ug cellphone ug uban pang mga butang.

Way nahimo igo na lang sa pagpa-blotter ang biktima.

Read More...

KAUPAT GYOD ka higayon nga gipabuthan ang usa ka bouncer sa imnanan didto sa Boulevard, Surigao City alas 8:30 ang takna niadtong miaging gabie.

Si PETER BAUTISTA LARIOSA, 31-anyos ang edad, minyo, security/bouncer ug mlupyo sa Purok 8 Navalca, Brgy. San Juan, Surigao City, gidali sa pagdala ngadto sa tambalanan human siya napusilan sulod mismo sa Camp G Disco Bar sa Boulevard, Surigao City.

Wala mailhi ang matang sa armas nga gigamit sa pagpusil, ug labaw na’ng wala masayri kinsa ang criminal nga mipusil sa bouncer.

Sumala sa imbestigasyon, nakit-an mismo sa testigo nga si Jason Macato Bernales, usa ka Electronic Technician sa Camp G Disco Bar ang pagpusil sa biktima, apan wala usab niini mailhi ang hitsura sa killer.

Giasoy sa testigo nga kaupat gyod gipusil ang biktima sa killer nga abtik nga mingsibat human sa pagpamusil paingon sa Borromeo Street.

Ang nahinumduman lang sa testigo nga ang suspek nagsul-ob ug jacket uban ang pinilo nga long sleeves nga may triangle sign sa likod niini.

Ang mga imbestigador nakarekober ug tulo ka mga basiyong cartridges sa cal. 9mm gikan sa lugar sa krimen.

Padayon pang giobserbahan ang biktima sa Surigao Medical Center. Gipaspasan usab sa mga pulis ang pagsubay kinsa ang maong suspek. (Jodian Jayme)

Read More...

BANAT KAY AWAAW: ni Chris V. Panganiban

KANUS-A kaha maundang kining pagsulay nga kabsan og kinabuhi kanamong naa sa media? Sa miaging adlaw si Manny Kong, usa ka walay pihig pihig nga komentarista sa radio sa Surigao City, ang bag-o napod nga biktima sa mga wa mailhing mga tirador. Mismo si General Antonio Nañas ang mibutyag nga may kalambigitan gayud sa trabaho ni Manny ang pagpusil kaniya. Si Manny nga nakigbatok sa iyang kinabuhi sa ospital sa Sugbo maoy labing ulahi sa taas na kayo nga listahan sa mga tigbalita nga gipamusil nga hangtud karon kasagaran wala pay kasulbaran sa imbestigasyon sa kapulisan.

Lahi na gayud ang panahon karon. Mora man o gang mga tirador nga dako ang akong pagtuo nga binayran walay nay kurat nga mobuhat sa ilang misyon. Lahi na man god pod ang kinaiya sa mga tawo nga naa sa katungdanan ug bisan pa kadtong nahilambigit sa sindikato. Dili na parehas kaniadto nga taas ang ilang pailob ug makasabot sa trabaho sa taga-media.

Karon kasagaran kanila mga panit sibuyas na ug dali lang maitok. Daghan naman god nila ang nagpasulabi sa pangabuso sa gahum ug dili gusto mahilabtan sa ilang hiwi nga binuhatan.

Ambot ngano pod nga daghan man mga tawo nga mosugot dayon kung suholan sa pagpatay. Ingon niini naba kaha kapit-os ang kinabuhi karon nga kapyot sa hait nga hinagiban na ang uban bisan pa nga ang ilang buhaton mao man ang paghunos sa laing kinabuhi. Matud pa sa akong tinubdan, kasagaran sa mga hired killers modawat na daw sa tanyag nga singko mil pesos lang. Pastilan. Wala na gayud bili ang kinabuhi karon. Duna nay mga tawo nga dili mahadlok sa Diyos aron makapanguwarta lang bisan sa gamay nga salapi bugti sa kinabuhi sa uban.

Dili lang hinuon mga taga-media ang tumong karon sa usong pamatay. Kay bisan gain inosente nga sibilyan sayon ra hunosan bisan walay klaro nga gipasanginlan. Bout ipasabot labihan na ka hugot ang paningkamot nga mabuhi nga unahan na karon kung kinsay makalahutay. Dili na tinuod ang panultihon nga survival of the fittest kundili ang fittest are already killing each other.

Apan mas anaa gayud sa peligro ang kahimtang kanamong mga taga-media. Kami man god ang mas dali mahalin sa mga hired killers bisan sa gamay nga bikil lang. Ang nakaparat ani kay wa mi kasayod kung kinsa na diay ang nasakit. Sa kadaghan sa mga tawo nga among ginatuki matag adlaw tungod kay nagpabadlong dili basta basta mahibaw-an kung kinsay unang nasuko. Gawas hinuon sa uban nga komentarista nga dunay suki na nga sumsuman sa kahanginan. Mao nga bisan kinsa kanamo wala nay kasegurohan kung hangtud kanus-a lang mabuhi ning kalibotan. (Ang tagsulat karaan nang peryodista sa San Franz sulod sa 20 na ka tuig. Alang sa inyong reaksyon, mahimo siyang i-text sa 09215896500 o i-email sa tigmantala @gmail.com o scribe39@yahoo.com)

Read More...

In My Lantawan ni Willy Evangelio

Lain na usab nga media man ang gipusil niadtong niadtong nilabayng adlaw didto sa Surigao City alas 2:15 ang takna sa hapon.

Si Manny Kong nga radio commentator sa DXSN nagtuman sa iyang bulahaton sa katilingbang pagkakomentaryo sa mga kahiwian sa gobyerno.

Kini lagging komentarista dili sayon nga trabaho, usahay makabangga og pader diin ang tag-iya mga gamhanan ug dili gustong magpasaway sa ilang hiwi nga mga binuhatan.

Ang mga langyawong grupo sa mga media organizations mitutok na karon sa Pilipinas ug gain miaway sa paagi sa pagpahilom sa taga-media. Giingon sa ilang report nga Segundo na ang Pilipinas sa nasod sa Iraq nga labing delikadong lugar para sa taga-media. Mag-ungaw sa kakuyaw matag adlaw ang kinabuhi sa mga mediaman nga gustong matul-id ang mga binuhatan sa anaa sa gobyerno.

Dinhi sa Pilipinas, labina sa mga hilit nga lugar, kasagaran ang mga taga-media walay magsuporta nga organisasyon. Kon duna man, mahuyang ang pondasyon. Maoy hinungdan nga pahimuslan sa mga killers tungod kay wala may ikasukol ang mga biktima intawon.

Ang pagsaway sa kahiwian sa anaa sa panggamhanan dili sayon nga trabaho tungod kay mahimong hulgaon o kaha patyon ang taga media nga nagbuhat sa ingon aron lamang pahilomon.

Read More...

Akong kusganong gikundinar ang talawanhong akto sa pagtiro sa usa ka inosenteng mediaman nga si Manny Kong. Ang maong salawayong buhat walay lugar sa usa ka “civilized” nga katilingban sa ato.

Dako ang akong ka lisang sa pamaagi nga gihimo ang maong akto, ug daku usab ang akong kaguol nga ang nagbuhat sa mao-ong krimen makabuhat pag-usab sa susamang buhat kung kini dili dayon masikop.

Ang pagsulay sa pagguba sa balaod ug kahusayan dili gayud itugot ug pasagdan lamang sa karon nga administrasyon. Akong buhaton ang tanan nakong mahimo nga ang responsible niini nga krimen mataral ngadto sa hustisya. Ako nang gimandu-an ang atong mga pwersa sa kapulisan sa pag-imbestigar dayon sa maong kaso sa pinakadali nga panahon.

Read More...

Surigao City – LAING SAKOP sa media na usab ang gibiktima sa wala mailhing killers sa nasod.

Si Manuel “Manny” Kong, radio commentator nga ilado sa walay tihik-tihik nga pagbatbat ug mnga isyu sa iyang programa sa radio ilabi na ang gituohang kahiwian sa ksamtangang administrasyon sa Surigao del Norte, gipusil saw ala mailhing mga armado didto sa kanto Magallanes ug Narciso Streets, Surigao City alas 2:15 ang takna sa hapon, Agosto 20.

Si Manny Kong, minyo ug residente sa M. Ortiz Extension, Kaskag, Brgy. Washington, Surigao City gipsuil makausa sa wala mailhing killers gamit ang .45 kalibre nga pistola samtanmg ang biktima anaa pa sulod sa itang sakyanan nga may plate number PPG 848. Wala na makapabuto ug ikaduha ang killer, tungod kay matud pa nagjam ang pusil niini. Bag-o lang matud pa nahuman si Kong sa iyang programa sa radio DXSN dihang nahitabo ang pagpamusil.

Human sa pagpamusil, matud sa pulis report, ang suspek minsibat paingon saw ala matino nga direksyon, sakay sa usa ka TS Suzuki motorcycle nga walay plate number.

Sumala sa report, siu Manny Kong naigo sa iyang wala nga aping ug gidali sa pagdala ngado sa Miranda Family Hospital sa Surigaso City.

Apan sa report nga nahiabot sa PERIODICO SURIGAO kagabie, gibutyag nga si Kong, gi-airlift paingon sa Cebu aron paingon sa Cebu aron paoperahan tungod kay wala makalapos ang bala. Luwas na siya sa taladuggon nga kahimtang.

Ikaduhang higayon na kining pagpusil kang Kong kagahapon.

Niadtong tuig 2002 gipusil usab si Kong saw ala mailhng killers apan naluwas kini. Wala maklaro kinsa ang suspek sa pagpusil kaniadto, apan nanggawas ang mga istorya nga “may pulitiko nga nagpaluyo sa pagpusil kang Kong kanhi.”

Si Kong nga iladong suod ni kanhi gobernador ug karon Siargao Island congressman Francisco “Lalo” Matugas, nabantog sa iyang mga pagbutyag sa mga “kahiwian” dinha sa gobyerno, pinaagi sa iyang programa.

Wala pay teyoriya sa Pulisya nga gipagawas labot sa pagpusil kang Manny Kong agahapon, apan kusog ang pagtuo nga ang nahitabo lagmit may kalambigitan gayod sa iyang trabaho.

Dli pa usab mahibaw-an hinuon kung ang pagpusil kang Kong kagahapon, may relasyon bas a unang pagpusil kaniya pipila ka tuig na ang nakalabay.

Nagpadayon pa ang imbestigasyon sa pulisya ning maong kaso. (J. Jayme)

Read More...

Sa mga taga Argentina gitawag kining ojotas. Sa taga Pransya sikat kini sa tawag nga tongs. Ang mga Mexicano gitawag pod kini nga chanclas o guaraches pero kitang mga Pinoy sikat ni sa tawag nga tsinelas.

Sa panahon nga ang importansya sa tsinelas gibalewala ra sa mga tawo, karon gihimo na kini nga fashionable accessory sa uban, salamat sa Brazilian brand nga tsinelas nga gipasikat nila David Beckham, Jennifer Aniston, Hilary Duff, Eva Longoria and Gisele Bundchen, ang Havaianas.

Pipila palang katuig kining nahiabot sa Pilipinas ug nakita na ang kalig-on ug kaelegante sa pagkahimo niini.

Ug isip tubag sa panganihanglan sa taga probinsya nga mamahimong dayag ang Havaianas brand sa nagkalain-laing lugar. Usa ka exhibit o pakita sa mga nagkalain-laing produkto ang pagahimuon diri sa syudad sa Surigao karong Agosto 18-19, 2007 didto sa Gateway Hotel, kini gitawag nilang Havaianas Pop-Up Shop in the South.

Sa pamahayag pa sa Managing Director sa Havainas, Terry S.A., “The concept (pop-up shop) connects with what our consumers want—the answer to their demand for fashion options combined with the element of surprise, exclusively and buzz.” (Fryan/Periodico Surigao)

Read More...

Wagtang ang P120-mil nga koleksyon, dihang gitulis sa tulo ka wala hiilhing mga tawo nga naka mascara. Ang bill collector sa Surigao del Norte Electric Cooperative (SURNECO) didto sa Sitio Agata, Brgy. Jubgan, San Francisco, Surigao del Norte alas 11:45 sa buntag niadtong miaging adlaw.

Ang taho gikan sa Surigao del Norte Provincial Police Office miila sa biktima nga mao si Manuel Dahog Manlimos, collector sa SURNECO.

Base sa imbestigasyon sa Surigao del Norte PPO, ang mga suspetsado mikuha sa mga butang mahalon ug itom nga back pack sa biktima diin didto gisulod ang collection nga mikantidad ug P120,000.00.

Sa follow-up operations sa sakop sa San Francisco PNP, naka-rekober sa usa ka itom nga motorsiklo nga Lifan Single Motorcycle (habal-habal) nga walay Plate Number, apan may engine number 161FMJ4154919 ug chassis number LF-3PCK0054D02. Ang sakyanan matud pa maoy gigamit sa mga suspetsado sa ilang pag-ikyas paingon sa Surigao City.

Gibiyaan ang maong motorsiklo human kini nadisgrasya ug nahulog sa tulay nga kahoy sa Sitio Bioborhan, Brgy. Jubgan, San Francisco Surigao del Norte.

Ang hot pursuit operation sa kapolisan usab misikop sa usa ka Arsenio Baclay y Hilanggao, molupyo sa Brgy. Cansayong, Malimono, Surigao del Norte.

Ang suspetsado nasikop didto sa Villa Corito, Surigao City, human kini natudlo nga usa sa mga suspetsado sa maong tulis.

Nakuha gikan sa posesyon sa suspek ang cash nga mikabat ug P1,600.00.

Kasong “Roberry with Violence and Intimidation Against Person” ang giandam batok sa suspetsado ug sa mga kauban niini nga gipangita pa sa kapolisan hangtud karon. (Noel Najarro)

Read More...

Arestado sa hiniusang team sa Philippine Ports Authority Police Station ang usa ka pasahero nga mosakay na unta sa ferry boat didto sa Lipata Ferry Terminal, sa Surigao City, Surigao del Norte human nasakpan na may dala nga pusil, alas 2:45 sa hapon niadtong miaging adlaw.

Giila sa pulis report ang dinakpan nga mao si Jay R Bacus Calulod, 30 anyos, taga Purok 3, Brgy. Southern Davao, Panabo City, Davao del Norte.

Si Calulod mosakay na unta sa ferry boat paingon sa lalawigan sa Southern Leyte, dihang pag-agi sa X-ray Machine sa iyang bagahe nakit-an ang Calibre .45 nga pistola nga may upat ka wa pa makabuto nga mga bala sulod niini. Walay gikapakitang papeles ang dinakpan nga nagmatuod sa legalidad sa iyang paghupot sa maong armas, hinungdan nga gisikop siya sa mga awtoridad.

Si Calulod, gidetene sa selda sa Surigao City Police Station, samtang giandam ang kasong “Illegal Possesion of Firearms and Ammunitions” batok kaniya. (Noel Najarro)

Read More...

Miulbo na usab ang laing GIYERA SA SURIGAO tali sa mga higanteng pulitiko-ang Matugas ug Barbers.

Kini human NABUGHAT na usab ang “panagbangi”sa duha ka pamilya.

Nagpadayon ang binayloay ug mga “mahalang nga istorya sa duha ka kampo, dili lang sa Surigao City kondili didto na gyod mismo sa kaulohan gamit ang mga gamhanan ug higanteng media outlets.

“Surigao del Norte Rep. Francisco Matugas and Gov. Robert Ace Barbers continued exchanging verbal blows in relation to the former’s rape case that was earlier revived by the Supreme Court,” matud sa report sa GMA News TV kagahapon.

Sumala sa report, ang pagbanhaw karon sa isyu nga ATTEMPTED RAPE batok kang kanhi gobernador ug karon Siargao Congressman Francisco “Lalo” Matugas, mihaling sa binayloay sa mga istorya sa duha ka mga kampo.

Si Matugas padayong mibasol sa pamilyang Barbers nga maoy nagpaluyo sa kaso batok kaniya.

Hugot kining gipanghimakak sa mga Barbers ug gitumbok si Matugas nga “must stop crying like a boy and face his problem like a man”.

Kahinumdoman nga niadtong Agosto 7, 2007, ang Supreme Court, pinaagi sa First Division nga gipangulohan ni Chief Justice Reynato Puno, mimando sa prosekyusyon sa kaso kontra ni Matugas.

Ang Supreme Court order, mitu-is sa September 2003 decision sa Court of Appeals (CA) nga nag abswelto na unta sa kongresista sa kasong attempted rape nga gipasaka sa iya kanhing empleyada.

“The CA had erred in reversing its findings at this embroyonic state of the proceedings,” matud sa order nga sinulat ni SC Justice Cancio Garcia, nga mipalig-on sa findings sa Department of Juctice nga adunay “probable cause” ang pagtaral kang Matugas.

“I know who is behind that case, mga Barbers. They warned me na they will do everything to destroy me. Last term ko sa governor so I decided to run as congressman, the same thing happened this election, tinalo ko naman ang isang Barbers. Galit lang sila sa akin”, sulti ni Matugas sa GMA report.

Si congressman Matugas nga kanhi mao ang gobernador sa Surigao del Norte, nagklaro nga ang ilang bikil sa pamilyang Barbers nagsugod dihang gipilde niya si Mrs. Regina Barbers nga maoy nanay ni kanhi Senador Robert barbers.

“Misamot kini dihang mikandidato si Atty. Nicanor Sering (ig-agaw ni Mrs. Sol Matugas) kontra kang kanhi congressman Ace barbers. Bisan napilde si Sering, apan gipalakaw gihapon kaniadto sa mga Barbers nga si Matugas maoy utOk sa kandidatura ni Sering,” pasabot ni Cong. Matugas nga miladlad nganhi sa Periodico Surigao sa “chronology of events” hangtud nga naumol matud pa ang kasong attempted rape batok sa kanhi gobernador.

Kahinumduman nga ang gireklamong “attempted rape” giingong nahitabo Hulyo 22-28, 19995 pa. Apan gi-file kini niadtong Mayo 10, 2001 na (adlaw’ang biyernes), tulo ka adlaw saw ala pa ang eleksyon (May 13, 2001). Ug bisan kung didto sa Pasay City gi-file ang kaso, halos dungan usab niini, matud sa kampo ni Matugas, naglanog-lanog usab sa mga radyo sa Surigao City ang balita bahin sa kaso batok sa kanhi gobernador, kumpleto na sa detalye sa kaso.

Hugot hinuong gipanghimakak ni Gov. Ace Barbers nga PULITIKA ang nagpaluyo sa pag-file sa kasong attempted rape batok kang Matugas niadtong 2001, o unom ka tuig human sa matud pa insedente.

“Politics was never involved when he alledgely tried to rape his victim, so why will he say that the case politically motivated? It is clear from the records that the crime was not committed by any member of my family, but by Matugas alone, sulti ni Barbers sa GMA report.

Sa GMA report, giklaro pod ni Matugas nga may pruweba siya nga siya ug ang gitudlong complainant, wala gyod didto sa Heritage Hotel sa Pasay City niadtong adlaw nga giingong nahitabo ang matud pa attempted rape”.

“Ayoko nang makipag-usap sa kanila (the victim and her family), because documents will show she was never in Manila on that date (July 1995),” dugang ni Matugas sa GMA report.

Si Barbers sa iyang bahin, nalipay sa desisyon sa korte suprema tungod kay matud niya, “justice is finally given a chance to be served”.

Read More...

Kuyaw na gyod tingali ang panahon karon. Hasta mayor sa siyudad, dili na exempted sa pagpanghasi.

Sumala sa pulis report, hasta ang yuta ni mayor Alfonso “Pons” Casurra biktima sa pagpanghasi saw ala mailhing mga tawo.

Ang pulis report nagtug-an nga usa ka Apronito Villar Culminas, 49-anyos ang edad, Agricultural Technologist of Barangay, ug usa ka empleado sa City Agriculture Office nga nagpuyo sa Barangay Sukailang, Surigao City, kuyog ni Flor Pacleb ug PO3 Godfrey C. Reyna, miabot sa Surigao City PNP aron ipa-rekord ang nahitabo sa umahan ni mayor Casurra.

Sumala sa report, ang utlanan sa umahan ni City Mayor Alfonso Casurra gihasi ug gipangdaut sa wala mailhing mga tawo.

Subay sa pasiunang imbestigasyon, gisulti ni Apronito V. Culminas nga ang mga mohon (post boundaries) sa umahan ni mayor Casurra, gipangdaut sa wala mailhing mga tawo.

Sa pagsubay, miabot gyod ug 30 ka mga post boundaries (mohon) ang nangadaut.

Ang pagpangadaut sa mga post boundaries namatikdan kagahapon ala 1:00 ang takna sa hapon.

Walay gikatudlong suspek sa maong hitabo ang nagbantay sa yuta.

Wala poy ideya ang mga imbestigador unsa ang posibleng motibo nga nagpaluyo sa maong insidente.

Gisubay na pag-ayo sa mga awtoridad kining maong report. (J. Jayme)

Read More...

Gipauso na usab diay karon ang kawat bateriya sa Surigao City.

Namatud-an kini sa sunod-sunod nga hitabo nga gipa-blotter sa buhatan sa pulisya.

Alas 11:00 ang takna niadtong miaging gabii, Agosto 8, 2007, nagpatabang sa pulisya ang usa ka Efren Oghayon, minyo, driver, nga taga Springville, Barangay Luna, Surigao City human nadiskubrehan ang pagkawagtang sa bateriya sa iyang sakyanan.

Sa iyang asoy sa kapulisan, gisulti sa biktima nga ang baterry sa gimaneho niyang multi-cab gikawat saw ala mailhing kawatan samtang giparada ang sakyanan sulod sa Gateway Hotel, Checkpoint, sa Barangay Luna, Surigao City.

Walay nakakita sa pagkawagtang sa bateriya ug wala poy gikatudlong suspek sa maong hitabo.

Kagahapon usa ka Venario Gohil, usab minyo ug usa ka driver nga taga Purok 6, Diamond, P. Reyes Street, Barangay Taft, Surigao City ang misumbong sa kapolisan nga gikawat ang iyang duha ka mga bateriya, (11 plates ug 9 plates) sa wala mailhing mga tawo.

Ang pasiunang imbestigasyon nagbutyag, nga ang duha ka mga bateriya gikuha sa kawatan gikan sa gimaneho niyang Forward Isuzu truck nga giparada sa Navarro Street, gawas lang gyod sa MEMCES, Barangay Taft, Surigao City.

Gituohan nga ang maong mga bateriya gikawat kagahapon sa kaadlawon, Agosto 9.

Parehong gisubay na hinuon sa mga pulis kining sunod-sunod nga kawat bateriya sa Surigao City.

Read More...

Sikop ang usa mekaniko nga taga Marawi, atol sa gihimong BUY-BUST operation sa mga pulis didto sa P. Reyes Extension, Surigao City alas 2:00 ang takna sa kaadlawon kagahapon, Agosto 7.

Giila sa pulis report ang dinakpan nga usa ka MAUNARA,PULUYAN AMEROL, 43-anyos ang edad, minyo, ug mekaniko nga taga Marawi City.

Ang buy-bust gihimo sa mga pulis pinangulohan ni P/INSP JEFFREY SIBALO TAMAYO ug P/INSP RYAN BARENA SABORDO sa Surigao City PNP, PDEA, ug Regional Office 13.

Narekober gikan sa dinakpan ang usa ka sachet nga may sulod sa gisuspetsadhang methamphetamine hydrochloride o shabu, usa ka improvised aluminum tooter, usa ka plastic lighter nga color orange, usa ka puti nga envelope, ug usa ka pakete nga cellophane, improvised shabu breaker, ug gisuspetsahang methamphetamine ug uban pang butang.

Narekober pod ang P500 nga gigamit sa buy-bust. Temporaryong gitanggong karon ang dinakpan, samtang giandam pa ang mga papeles alang sa pagpasaka ug kaso. (Jodian Jayme)

Read More...

Hasta diay sa mga baryo, uso na pod karon ang pickpocket o pagpanguot.

Namatud-an kini sa usa ka Luzviminda Dianon, minyo, empleyado sa RHV, Mainit Surigao del Norte nga midangop sa kapolisan human siya matud pa nabiktima sa pagpanguot didto sa barangay San Juan, Surigao City kagahapon.

Sa iyang asoy, gisulti sa ginang nga samtang mihapit siya sa usa ka sari-sari store kay adunay gipalit, namatikdan nalang niya ang duha ka wala mailhing mga lalaki nga mipaduol kaniya.

Sumala sa ginang, ang duha ka mga lalaki, kadudahan gyod ang mga linihokan.

Gipasabot sa ginang nga wala madugay, mao nalay iyang namatikdan nga nawagtang na ang iyang pitaka sulod sa iyang bag apil na ang mga sulod niini.

Gitug-an sa ginang nga apil nga nawagtang ang iyang ATM card sa LandBank,PNP, Suki Club card, TIN ID, Office ID, GSIS ID, Office ID (RHU Mainit), ug cash nga P400.00, way labot pa ang mga Pawnshop receipts.

Matud sa ginang, sa paghiling gyod niya sa iyang bag, nasuta niya nga wala na didto ang iyang pitaka nga gibutang sulod sa iyang shoulder bag, ug naabli na ang zipper dihang iyang gihiling.

Wala hinuon makaila ang ginang sa duha ka mga lalaking iyang gidudahan nga maoy mikuot sa iyang pitaka.

Wala pa masayri unsa kaha ang mamahimong aksyon sa Pulis Surigao ngadto sa nauso na pod karon nga PICKPOCKET SA BARYO. (Jodian Jayme)

Read More...

Naa nay bag-o nga resort hotel ang syudad sa Surigao. Usa ka Opening ug Blessing ang gihimo niadtong biyernes, Agosto 3 didto sa Brgy. Day-asan, ang Day Dream Laguna Resort. Gitambongan kini ni Mayor Pons Casurra, Kagawad Nilo Aldonza ug Kagawad Carlos Gorgod.







Pwede nijo sila makontak sa 09178812788 o di kaha sa 09209474816. Naa pod sila fax (086) 2316428. You can also email them at dd_lagunaresort@yahoo.com for more details. Owned and managed by Mrs. Lydia Apao Bullivant.

Read More...

Namatay gyod ang usa ka babaye nga mitabok sa karsada kuyog ang usa ka 5-anyos nga bata, dihang gidasmagan sila sa usa ka single nga motorsiklo didto sa Capitol Road, Surigao City alas 8:10: ang takna niadtong miaging adlaw, Agosto 4.

Gibawian gyod sa iyang hinulamang kinabuhi si Helen Galo, taga Barangay Navarro, Socorro, Surigao del Norte human sa usa ka oras nga pag-atiman sa mga doctor kaniya didto sa Caraga Regional Hospital.

Ang kauban ni Helen nga 5-anyos nga bata nga si Kaye Galo, ingon man ang backrider sa motorsiklo nga si Julius Abadilla, gitaho nga nasamdan pod ug gidala gihapon sa tambalanan. Sumala sa pulis report, ang single Honda motorcycle nga may plate no. LN 1637 nga gipanag-iya ug gimaneho ni Dionisio Salque Abadilla, taga 15068 Capitol Road, Surigao City nagdagan sa Capitol Road, apan dihang naka-abot kini sa atubangan sa Sarmiento Residence, kalit lang mingtabok sila si Helen ug Kaye Galo, hinungdan nga aksidenteng nadasmagan kini sa motorsiklo.

Ang mga biktima nangatumba sa sementadong dala, hasta na pod ang motorsiklo ug ang mga sakay niini.

Parehong naka angkon ug bun-og ang backrider nga si Julius Abadilla u gang duha ka mga Galo, busa gidali sila pagdala sa Caraga Regional Hospital.

Mismong ang driver sa motorsiklo maoy nagdala sa mga sa mga biktima ngadto sa tambalanan, matud sa report.

Apan ang follow up report nagtug-an nga ang biktimang si Helen Galo, gideklara sa mga doctor nga patay na paglabay sa usa ka oras nga pag-atiman kaniya.

Ang motorsiklo ug ang driver padayong gipugngan pa sa buhatan sa Surigao City. (Jodian Jayme)

Read More...

Mga alas 3:00 ang takna sa hapon adton sabado, malampuson nga naghugpong ang tanan mga Media personalities nan tibuok probinsya didto sa Gateway Hotel, pati mga commentators sa nagkalain-laing partido jadto nuapil. Isa sa mga nahisgutan didto mao ang pagtukod nan isa ka organisasyon para sa mga Media diri sa Surigao, ginganlan kini nila ug Media Association of Surigao (MASU). Jari an mga pipila ka mga hulagway na nakuha nan Periodico Surigao didto sa maong panagtigum.

Read More...

Wala maka-apekto sa mga programa sa kauswagan, ilabi na sa pang turismo sa lalawigan sa Surigao del Norte ang pagbulag ug pagkahimong lahi nga probinsiya sa isla sa Dinagat.

Gawas lamang sa kamingaw sa mga taga Surigao sa mga Dinagatnon nga kanunay nilang ika-uban sa mga nag-unang mga kalihokan sa lalawigan, ug sa aktibo niining pag-apil sa mga nag-unang mga kalihokan sa lalawigan, ug sa aktibo niining pag-apil sa mga nag-unang program pangturismo ug kulturanhon, wala nay dako kayo nga epekto ang pag-lain sa Dinagat gikan sa Surigao del Norte.

Matud ni Surigao del Norte Gov. Ace Barbers, ang kagamhanan sa Dinagat ug ang mga dinagatnon, aktibo kaayong mipartisipar sa mga kalihokanng pang turismo sama sa mga nanglabayng mga Unternational Surfing Competitions nga gipahigayon.

Matud sa Gobernador, ang bag-ong lalawigan mismo, sama usab sa lalawigan sa Surigao del Norte nga gigikanan niini, puno sa mga matahom nga mga dapit pang-turista ug abunda usab kini sa mga bahandi sa kinaiyahan.

Sama sa lalawigan sa Surigao del Norte, usa usab ka “potential tourism destination” ang lalawigan sa Dinagat, matud ni Barbers.

Sumala sa gobernador, nga bisan kon ang usa sa mga nanag-unang prayoridad sa iyang administasyon, mao ang pagpalambo sa “tourism industry” sa mga matahom nga mga dapit sa Surigao del Norte, sama sa Isla sa Siargao ug daghan pang uban, apan dili usab niya pugngan kon may mga programa man o mga kalihokang pang turismo nga tambayayongan ug hiusahan sa duruha ka mga managsilingang lalawigan sa umaabot nga mag panahon. (N. Najarro)

Read More...

Nasikpaw na ang suspek sa mga kasong kawat sa barangay Lipata, Surigao City.

Matud sa report sa Surigao City PNP, arestado na ang usa ka Lito Villarin y Peligro, 23, anyos ang edad ulitawo, walay trabaho nga lumad sa Cipaway Luray II, Toledo City nga nagpuyo sa kasamtangan sa Purok 3, Kambalong, Brgy. Lipata, Surigao City.

Si Villarin, maoy gipasanginlan nga mikawat sa pitaka sa usa ka Bairona Sultan Pandapatan, 35 anyos, usa ka negosyante sa Kambalong. Ang nawalang pitaka giingong may sulod nga P 20,000.00 ug usa ka yunit nga cellphone Nokia 3315, kolor rosas ug may sim # 09215938515.

Ang imbestigasyon nagpakita nga samtang nahinanok ang biktima sa pagkatulog uban sa iyang mga anak, sekretong nakasulod sa ilang panimalay ang suspek pinaagi sa pagmugna ug gamay nga bangag sa aluminum screen dayon gituklod ang lock ug gitangag ang pitaka sa ginang.

Apan gitug-an sa balita nga ang suspek nakit-an sa usa ka Mrs. Elma Arlan, nga nag ingon nga bandang alas 12:00 sa tungang gabii niadtong Agosto 1, 2007, sa pag-abot sa ginang sa ilang balay, nakit-an niya ang suspek nga nagtago ug nag-ukay ukay sa likod sa balay sa biktima. Giklaro sa ginang nga positibo gyod siya ug nakaila siya sa suspek tungod kay nasug-an niya kini sa iyang flashlight, hinungdan nga nahitabo ang ginukdanay paingon sa bakilid diin nahimutang ang balay sa suspek.

Sa follow-up operations nga gihimo nila ni SP03 Alfredo Aristan, P02 Angelus Maderal, Brgy. Chairman Aborque, Brgy. Kagawad Romeo Pitos ug Brgy. Kagawad Bartolome, narekober sulod sa balay sa suspek ang P19,000.00 cash, usa ka cellphone N3315, usa ka lata nga karne norte ug usa ka latang tinapa.

Gitanggong na karon ang suspek sa Surigao City PNP, samtang gipaabot ang pagpasaka sa pormal nga reklamo batok kaniya. (Jodian Jayme)

Read More...

Misamot na gyod ang pagdagsang sa mga kasong kawat sa Surigao City. Hasta lipstick, giapil na sa pagkawat.

Usa ka Junilia Perral y Beguña, 47-anyos ang edad, minyo ug dietician sa PHO, Surigao City ang misumbong sa pulisya human matod pa gisulod saw ala mailhing kawatan ang iyang panimalay didto sa Kilometro 3, Barangay Luna, Surigao City.

Sumala sa dietician, nawagtang ang iyang cellphone N 3315 cel # 09195346930; Sony Ericson T-610 cash money nga balor P1,000.00; sunglass (imported) ug lipstick.

Matud sa imbestigasyon, ang mga suspek nakasulod sa balay pinaagi sa pag-abli sa “slide window” samtang nahinanok ang biktima.

Alas 5:00 na sa buntag dihang namatikdan ang maong kawat. (Jodian Jayme)

Read More...

Hugot gayod nga mibabag ang gobyernong local sa Surigao City ngadto sa planong pagwagtang sa Bureau of Fisheries and Aquatic Resources (BFAR) gikan sa Surigao City aron ibalhin kini sa Butuan City ang regional capital sa Caraga Region.

Sa sesyon regular sa SANGGUNIANG PANLUNSOD sa Surigao City di pa dugay, gipasar niini ang RESOLUTION NO. 141-2007, nga hugtanong nagpadayag sa dakong pagsupak sa city government ngadto sa nahisgutang laraw.

Mismong si City Mayor Alfonso Casurra maoy nag-una sa pagbabag sa plano, kamatuoran ang iyang sulat ngadto sa Sangguniang Panlungsod nga naghangyo sa Sangguniang nga ipasar ang usa ka resolusyon nga hugot nga mosupak sa planong pagbalhin sa BFAR.

Sa resolusyon, gipasabot sa mga Surigaonon nga ang pagbalhin sa BFAR Regional Office ngadto sa Butuan City, dako gayod ang epekto ngadto sa industriya sa panagat, ilabi na nga ang siyudad sa Surigao ug lalawigan sa Surigao del Norte mao ang usa sa labing dako nga tinubdan sa mga isda ug uban pang fishery products sa tibuok Caraga Region.

Gawas nga maapektuhan ang katawhan nga adunay mga transaksyon sa BFAR, ang SP resolution nagtin-aw nga “wala kinahanglana” ang maong pagbalhin.

“that the transfer is uncalled for considering that the establishment of the creation of the Caraga Region and in accordance with the law”, patin-aw sa Surigao City resolution.

“Now, therefore, on motion of Hon. Luceniano E. Lancin, seconded by Hon. Remidion S. Calderon, it was unanimously resolved: that the City Government of Surigao vehemently objects to the transfer of the Regional Office of the Bureau of Fisheries ang Aquatic Resources (BFAR) from Surigao City to Butuan City”, dugang sa resolusyon. (Jodian Jayme)

Read More...

USA KA EMPLEYADO ang gipugngan karon human siya gilambigit ngadto sa nahitabong kawat sa balay sa iyang gitrabahoan didto sa Vazquez Street, Surigao City kagahapon.

Sumala sa pulis report, usa ka Danilo Sabocohan Soltero, 38 anyos, minyo, ug driver sa Kent Market nga taga P. Reyes Street, Barangay Taft, Surigao City ang ming report sa pulisya labot sa usa ka suspek nga matud pa nasakpan sa iyang mga kauban, ang gipugngan tungod sa kasong kawat didto sa building sa ilang gitrabahoang si Elie Tan sa Vazquez Street, Surigao City.

Sa pagresponde sa pulisya , naila ang suspek nga mao si NEWELL CONALES y KIP, 23-anyos, ulitawo ug empleyado ni Elie Tan (tag-iya sa ELICOR).

Sumala sa reklamo, ang suspek maoy gibasol sa pagkawala sa usa ka cellphone Nokia 6233 with cam balor P 10,000.00 ug usa ka cellphone Nokia 3310 nga kantidad ug P4,000.00 nga gipanag-iya sa usa ka Jenelyn Ampilanon taga San Jose, Dinagat Island.

Gipasanginlan pod ang suspek sa pagkawala sa relo nga gold plated balor P 1,500.00 nga gipanag-iya ni Arcie Nies, taga Cagdianao, Dinagat Island; cellphone Motorola C156 nga kantidad ug P 3,900.00 nga iya ni Danilo (ang complainant).

Sa pasiunang imbestigasyon, ang mga trabahante nagkauyon gyud sa pagtudlo sa suspek nga si Newell, nga maoy nagkuha sa ilang mga butang, tungod kay siya lang si Newell ang giingong mata niadtong higayona.

Nasayran nga giguba ang kandado sa pultahan, apan gisulti sa mga empleyado nga gikan gyud sa ilalom sa balay ang nagguba niini.

Hinuon, sa dugang imbestigasyon sa pulisya, wala gyoy miangkon nga nakakita sa suspek nga si Newell nga mao gyod ang mikuha sa gipangbutyag nga mga nawagtang nga butang.

Nagpabiling dili pa maklaro ang pasangil batok sa suspek, apan padayon pa kining gipugngan sa mga pulis alang sa dugang pagsukit-sukit. (Jodian Jayme)

Read More...

Andam na ang lalawigan sa Surigao del Norte alang sa 13^th Siargao International Surfing competition.

Kini ang gipahibalo ni Gov. Robert Ace Barbers, atol sa pakigtagbo niya sa mga sakop sa regional press didto sa usa sa mga hotels sa Surigao City kagahapon sa hapon.

Sumala sa bag-ong Governador sa lalawigan sa Surigao del Norte, ipahigayon ang maong panagtigi sa kahanas sa surfing didto sa General Luna sa Isla sa Siargao, karong Septembre 23-30,2007. Ang maong competisyon, dili lamang apilan sa local nga mga surfers kondili, may mga magagikan usab sa ubang mga dapit sa nasud ug bisan pa sa gawas sa Pilipinas.

Matud sa Gobernador, nagpadala na sila ug mga imbetasyon, dili lamang sa ubang mga dapit sa Pilipinas kondili ngadto usab sa gawas.

Sumala ni Gob Barbers, nagkadaghan gyod ang mipakita sa ilang kasibot sa pag-apil sa maong kumpetisyon.

Si Gov. Barbers nagpasabot nga ang lalawigan sa Surigao del Norte mihimo na sa iyang preparasyon, ug gipaabot na lang nila ang suporta sa mga ahensyang nasyonal sama sa Dept. of Tourism, Philippine Tourism Authority ug uban pa.

Nanawagan ang gobernador sa tanag sector ilabi na sa mga LGU”s nga ipadaplin una ang pulitika ug unahon kon unsa man ang makahatag ug kabululahanan sa lalawigan, rehiyon, ug sa nasud. Gihangyo usab niya ang mga sakop sa media ning rehiyon sa paghulagway sa dapit sa kamatuoran niini, nga kini malinawon ug nga ang dapit mismo sa lalawigan, puno sa mga matahom ug angayan ikapasigarbo nga mga talan-awon, dili lamang sa mga local nga mga bisita kondili bisan pa sa mga turista. (Noel Najarro)

Read More...

Gipasalig ni Gob. Ace Barbers nga malinawon ang rehiyon ilabi na ang lalawigan sa Surigao del Norte ug luwas kini sa bisan unsa mang matang sa hulga ilabi na sa terorismo.

“Malinawon sa tibuok nasud ang Rehiyon, ilabi na ang lalawigan sa Surigao del Norte ug luwas kini sa bisan unsa mang matang sa hulga sa kahusay ug kalinaw, ilabi na sa terorismo”, matud sa gobernador.

Gitug-an ni Barbers nga sa iyang pakigtagbo sa mga opisyal sa kapolisan ug kasundaluhan sa rehiyon, gipasaligan siya sa kamalinawon sa dapit. Apan giasoy usab sa opisyal, nga may gipahimutang na karon pa lamang nga mga contingency plans alang sa seguridad sa mga mobisita ilabi na sa mga langyaw nga mopartisipar sa umaabot nga surfing competition sa Siargao Island.

Matud niya nga sa kadaghanan sa mga mipakita ug kasibot sa pag-apil sa kumpetisyon dili lamang sa mga ania sa nasud kondili bisan pa sa gawas, karon pa lamang, kini nagpakita nga mituo ang mga turista ug mga bisita ning rehiyon ug sa iyang lalawigan nga malinawon ug luwas gyud ang dapit.

Read More...