Dunggab Sa Borromeo, 1 Ang Patay

Usa ka kinabuhi na usab ang nakalas sa nagpadayon nga pagpauso sa kasong pagpanunggab sa lain-laing dapit sa Surigao City.

Si pablito Pilar y Ocola, 34-anyos ang edad, gitaho nga wala na magdugay sa hospital ug nabugtoan gyod kini sa iyang gininhawa human siya nadunggaban ug sundangay sa Emma’s Barbecue House, Borromeo St., Surigao City alas 12:30 sa tungang gabii niadtong Enero 10, 2008.

Usa ka Erland Gerarcas Salino, ulitawo nga molupyo sa Borromeo St., Surigao City maoy gitudlo nga suspek sa nahitabong pagpanunggab.

Sa pagkasayod sa hitabo, nagdali ang pulis Surigao sa pag-adto sa dapit sa krimen, apan ulahi na kaayo ang tanan, kay gidala na ang biktima ngadto sa Caraga Regional Hospital aron patambalan.

Pipila lang ka gutlo hinuon sa tambalanan, ang biktima gideklara sa mga mananambal nga patay na.

Sumala sa imbestigasyon, sa wala pa ang hitabo, nagkalalis pa ang suspek ug ang biktima hinungdan nga nayagaw ang ubang kostomer.

Taliwala sa panaglalis, ang biktima kalit lang midagan palayo sa suspek. Didto kini nakadangop sa Emma’s Barbecue House, apan gigukod kini gihapon siya sa suspek ug didto gihansakan dayon makaduha ka higayon tumong gyod sa dughan.

Human nakabuno, paspas nga mingsibat ang suspek paingon sa wala matino nga lugar.

Nagpadayon pa ang imbestigasyon sa pulisya ning maong kaso.