Daghan Na Ang Nabasa

Morag sakit nga mananakod, ang istorya sa NBN-ZTE posoy deal. Haskang daghana na ang nasangit!

***

Primero, si COMELEC Chairman Benjamin Abalos ug First Gentleman Mike Arroyo ra ang gituslok. Pero karon, haskang daghana na ang migimok ug naapil sa gilok.

***

Sa sinugdan, ang anak ni kanhi Speaker Jose de Venecia, Jr., nga si Joey de Venecia maoy nagyagyag sa giingong OVERPRICED nga transaksyon. Dayon, migawas ang istorya nga may gustong maka-um-um.

Misamot dihang si kanhi Speaker de Venecia. Nanggawas na dayon ang istorya nga SIGURADONG SIPA na siya sa iyang pagka-Speaker!

***

Pila kaha ka gabie nga way maayong kinatulgan si JDV, una nahuman ang sugilanon. Ug tuod man, subay sa giingog NAHISULAT NA ANG TANAN, nalagpot gyod si de Venecia sa iyang katungdanan.

***

Pero ang ZTE-NBN gilok padayon nga mikulikot. Human nagbirthday ug hulga sa WARRANT OF ARREST gikan sa Senado si Secretary Neri, nawala ang iyang consultant nga si Jun Lozada. Taranta ang tanan. Taranta ang media, hasta na ang mga GAMHANAN dihang nangugat ang mga tinubdan nga si Lozada adto gyod sa senado ipaatubang.

***

Ug pagtugpa gyod sa tugpahanan, kalit lang gisakmit si Lozada sa mga kamot nga ambot kang kinsa. Nanggawas ang istorya nga gikidnap si Lozada.

***

Ug human sa presscon sa kaadlawon, naklaro ang sugilanon. Si Lozada gipugos daw pagsignit aron dili maka-TELL THE TRUTH sa senado.

***

Apan sama sa sapa, wala gyud kapugngi. Mibuhagay ang mga istorya. Ug karon, tibuok kalibutan na ang nasayod nga MAY GUSTO GYOD MANGUWARTA niadtong ZTE-NBN posoy transactions.

***

Dayon, nagpusot-pusot ang mga hulga. Idemanda ang senate blower nga si Lozada ug libelo. Pasakahan ang iyang pamilya ug kaso nga forgery. Gukdon pod siya si Lozada tungod sa isyong kurakot sa iyang pagpadagan sa iyang opisina kanhi-ang Philforest.

***

Wala pa didto matapos ang sugilanon. Mitulo na ang daghang luha ug sip-on ni Lozada ug sa iyang pamilya. Nabasa na pod ug maayo ang ngalan sa mga Arroyo, nga naapil na intawon ug waswas sa NBN-ZTE issue. Taktak na pod sa puwesto sa pagka-Speaker si de Venecia.

***

UG karon, si PNP chief Avelino Razon na pod ang gituslok-tuslok sa iyang mga mixta sa PMA. Gi-awhag si Razon nga RESIGN NA LANG kay sa pugong-pugongan mo ang kamatuoran.

***

Unya, ang GILOK sa gibulgar nga transaksyon nagpadayon. Human sa makabungog nga diskurso ug saway atol sa martsa-protesta niadtong usa ka adlaw, naghulga si DOJ secretary Raul Gonzales nga si SIPAON GYOD sa puwesto ang mga sakop sa gabinete nga moapil sa MISA para suporta kang Lozada niadtong Domingo.

Walay tuod cabinet member sa kasamtangang administrasyon ang misalmot, pero nagtapok ang karaan ug kanhi mga cabinet secretaries nga gilangkuban ug 60 kabuok. Nagkahiusa ang kanhing mga TAGA MALAKANYANG sa ilang panawagan sa ilang mga counterparts karon nga mopahawa na samtang “wa pa silay mantsa.”

***

Pero ang panawagan ug manifesto gibalosan ug panawagan ug manifesto. Ang kasamtangang mga sakop sa gabinete ni Mrs. Arroyo mingpilit ug maao sa ilang puwesto ug nagklaro nga “didto na lang sa korte dalhon ang NBN-ZTE issue.”

***

Kada adlaw, ingon niini ang sistema sa kaulohan sulod na karon sa pipila ka semana. Kada adlaw, anaa ang drama. Kada adlaw giatangan ang historia. Kada-adlaw usab ang PAGPANGHIMAKAK o DENIAL!

***

Sa ato nang giingon, morag TUBIG kining isyu sa NBN-ZTE-posoy transaksyon. Kanus-a hinuon nabuslot, dinha pa mibuhagay ug samot.

Haskang daghana na ang nangabasa.