Dunggab sa Brgy. Taft Padayon
Bisan pa sa gianunsyo nga hugot nga kampanya sa Pulis-Surigao batok sa makamatay nga mga armas, nagpadayon ang kasong dinungabay.
Usa ka ulitawo ang anaa sa malisod nga kahimtang karon sulod sa tambalanan human siya gidunggab sa usa ka Dapan-on didto sa boulevard, duol sa Diez Street, Barangay Taft, Surigao City, alas 9:00 ang takna niadtong miaging gabii.
Ang biktima, giila nga si MIGUEL DIEGAS, lumad sa cabilan,Dinagat, Dinagat Province samtang ang suspek, mao usab ang usa ka ULYSSES BORNALES SOLLOS, 26 anyos, minyo, usa ka tricycle driver nga lumad sa Sta. Fe, Dapa, Siargao Island, Surigao del Norte nga nagpuyo temporaryo sa Nueva Ext.., Brgy. Taft, Surigao City.
Usa ka karaang dumot ang gitudlong rason sa pagpanggab gamit ang usa ka 27 pulgadas nga sundang.
Matad sa report, boluntaryong miampo ngadto sa pulisya ang suspek nga si Sollos, ug mao nay nagsulti sa pulis nga nakadunggab siya didto sa taft.
Sa iyang sulti sa pulisya, giklaro ni Sollos nga daghang higayon gyod niyang gidunggab ang biktima tumong sa lain-laing parte sa kalawasan niini.
Gibutyag nga kung wala pa paundanga sa igsoon ang suspek, nagpadayon pa unta kini sa pagpanunggab. Gihatud mismo sa igsoon ang suspek ngadto sa pulis.
Ang biktima, gidali sa pagadla ngadto sa CARAGA Regional Hospital diin gitambalan ang duha niya ka mga samad dinunggaban sa tiyan, ug liog.
Gibutyag ubos sa hugot nga obserbasyon sa mga doctor ang nahisgutang biktima.
Apan ang suspek nga gipugngan karon sa mga pulis, giandaman na ug tukmang kaso nga giakdang ipasaka sa korte sa labing madaling panahon.
