2 Ka Way Plaka Nga Motorsiklo Nagsungag: 2 Ka Angkas Pulos Samdan

Dili lang diay way lisensya nga mga drivers ang uso karon, hasta na ang way plaka nga mga sakyanan, gipasalida na sa mga kadalanan.

Kini luyo sa gipasiatab nga programa sa kagamhanan nga NO PLATE NO TRAVEL POLICY.

Ang nakadimalas ning way permiso nga mga sakyanan kay sagad maoy hinungdan sa mga nanghitabong disgrasya.

Duha ka mga tawo ang nasamdan human nagsungag ang duha ka walay plaka nga motorsiklo didto sa Rizal St., kanto Gimena St., Surigao City alas 10:45 ang takna niadtong miaging gabii, Marso 29.

Ang nalambigit nga sakyanan mao ang Honda wave nga walay plaka nga gipanag-iya ni Nancy Martinez sa 01941 Espina Village, Surigao City ug gimaneho ni Nick Ervin Martinez, ug Honda XRM nga wala gihapoy plate number nga gipanag-iyahan sa usa ka Ariel Arevalo, taga Barangay Mabini, Surigao City, nga gipadagan pod ni Adrian Zerda taga Brgy. Mat-i, Surigao City, kinsa giingong nag drive nga walay lisensya ug wala pa gyod makapresentar ug rehistro.

Sumala sa report ang Honda wave nagdagan sa Gimena Street, Surigao City paingon sa habagatang kasadpan nga direksyon. Ang laing motorsiklo nga XRM Honda, nagdagan gihapon sa Gimena Street paingon pod sa direksyon sa habagatan.

Apan pag abot sa intersection, aksidenteng nadasmagan sa XRM ang Honda wave hinungdan nga parehong natumba ang duha ka mga motorsiklo. Nangasamad ang angkas sa duha ka mga sakyanan nga giilang sila Nancy Martinez, ang tag-iya sa sakyanan; ug Irish Arevalo y Malto nga taga Purok 8, Brgy Mabini, Surigao City busa gidali sa pagdala ngadto sa Surigao Medical Center.

Wala hinuon gisulti sa report unsay gidangatan sa duha ka mga drivers.