Iro Batok Motorsilo: TagaDAR Patay, 1 Pod Grabe

PATAY ANG USA KA SAKOP sa Department of Agrarian Reporm (DAR), samtang grabe pod ang kauban niini, dihang nakigsungag ang ilang gisakyang motorsiklo ngadto sa usa ka latagaw nga iro didto sa Maharlika Highway, sa Sityo Kinabutan, Barangay Rizal, Surigao City alas 8:35 sa buntag niadtong miaging mga adlaw.

Ang namatay mao ang usa ka GEMMA GUILLERMO, 42-anyos nga empleyada sa DAR, ug residente sa Bagong Silang , Kaskag, Brgy. Washington, Surigao City. Matud sa report, ang biktimang si Guillermo, miangkas sa single motorsiklo nga Honda SR 200 nga may Plate # FP 2366 (red plate) nga gipanag-iyahan sa DAR EARIST sa FABSO Bldg., Elliptical Road, Quezon City, Second District National Capital Region ug gimaneho ni ALFREDO ESPER ALVAREZ, 42 anyos pod nga empleyado sa DAR nga taga Dubduban compound, Brgy. Rizal, Surigao City.

Sumala sa imbestigasyon, ang motorsiklo malinawon nga nagdagan sa Maharlika highway, didto sa Sitio Kinabutan, Brgy. Rizal ug nagpaingon sa direkyon sda barangay Lipata. Pag – abot nila sa duol sa Julia residence, chalet lang nga may latagaw nga iro ang mitabok sa highway ug aksidenteng nasungag kini sa motorsiklo.

Tungod sa pagdasmag, nawad-an ug balance ang motorsiklo, hinungdan nga nahagba kini sa sementadong karsada kuyog sa driver ug sa angkas. Gidali pagdala sa Surigao Medical Center ang driver nga si Alvarez, ug ang angkas nga si Gemma Guillermo. Pero wala madugay ang driver gibalhin sa Miranda Family Hospital, samtang ang angkas nga si Guillermo gidali pasgdala ngadto sa Butuan Hospital. Ang report hinuon sa Pulisya nagtug–an nga ang angkas nga si Guillermo gitaho nga namatay gayod didto sa Santos Memorial Hospital, sa Butuan City, bandang alas 3:00 sa hapon niadtong usa ka adlaw.