6th Sen. Robert “Bobby" Barbers Memorial Cup Bancarera National Championship Gipangandaman Na

Nangandam na karon ang buhatan sa Provincial Sports Office para sa umaabot nga 6th Sen. Robert “Bobby” Barbers Memorial Cup BANCARERA National Championship karong buwan sa Mayo 2008 didto sa Barangay Mabua, ning dakbayan.

Ang atong Provincial Sports Coordinator, Mr. Joel Posesano nagkanayon nga ubay-ubay karon ang mosalmut sa maong lumba sa pumpboat, nga gipasiugdahan sa provincial government ug sa pamilyang Barbers. Sa nasayran, ang ilang amahan ug ang gimahal sa mga Surigaonon, Sen. Robert “Bobby” Z. Barbers maoy nagsugod sa maong kalihukan sugod pa niadtong 2002.

Matud pa sa maalagarong Gobernador Robert Ace S. Barbers, kinahanglan gayud nga adunay Bancarera karon nga tuig tungod kay ang Bancarera usa sa mga gikahinaman sa mga Surigaonon nga ilang gayong gisunod sa pagtan-aw tungod sa kaaligre niini. Anaay lain-laing sports activities nga masaksihan sama sa Sky Diving ug Jet Ski agig pahinungod kang Senator Robert “Bobby” Barbers gikan sa ilang mga suod kaayo nga higala, ug sa kadaghan nga miapil sa maong lumba nga nagagikan sa nagkalain-laing probinsiya ug sa kadagko sa mga premyo. Ang first prize-Php 40,000.00, 2nd – Php 30,000.00, 3rd –Php 20,000.00 ug 4th Php 10,000.00.

Ang mga imbitadong musalmot sa maong bancarera mao ang gikan sa Zamboanga, Dipolog, Saranggani, Nasugbo, Batangas, Maasin, Surigao Sur-Cantilan, Placer, Mabua ug Dinagat.

Ang mga interesado pang musalmot moadto lamang sa buhatan sa Provincial Sports Office nga anaa na karon sa Provincial Center Lobby, ug makigkita kang Mr. Joel Posesano alang sa dugang impormasyon.