Kawat Bugas Na Gyod Sa Surigao, Bugas para sa Estudyante Gi-unay

Tungod ba kaha sa sobrang kagutom, bugas na gyod ang gipahimungtan sa mga kawatan karon.

Nadakpan hinuon ang tulo ka mga menor de edad nga miunay sa pagkawat sa bugas nga gitagana alang unta sa mga estudyante sa Cayutan Elementary School.

Personal nga giturnover ni Kagawad Roel Ganzon sa Brgy Cagniog ngadto sa pulisya ang mga suspek nga sila si alyas Leo, 9-anyos, Ronron 11-anyos; ug Jekjek 9-anyos human sila gidakop tungod sa kawat bugas.

Sumala sa imbestigasyon, ang tulo maoy mikawat sa mga bugas alang unta sa mga tinun-an sa Cayutan Elementary School. Ang kinawat nga mga bugas, gibaligya ra pod sa mga suspek ngadto sa usa ka Ernesto Alvino ug Piladelfa Alvino sa tag P15.00 lang kada kilo.

Gisulti sa mga suspek nga nakabaligya na sila ug balor usa ka sako nga bugas diin gibayran sila ug P200.00.

Narekober ni Kagawad Ganzon ug uban pang sakop sa barangay ang balor 7-kilos nga bugas gikan sa posesión ni Mr. And Mrs. Alvino.

Ang mga suspek nga batan-on, temporaryong gi kustodiya sa pulisya apan gitakda kining iturnover ngadto sa DSWD.