Surigao del Norte Libre Na Sa Malaria  

Lain na usab nga dungog ang nakuha sa Surigao del Norte ug Surigao City tungod kay giila kini sa World Health Organization nga nahiapil na sa mga dapit sa nasud nga “Malaria Free.”

Kini, sumala ni Mr. Jonathan Basadre, Resident Entomologist sa Caraga Center for Health Development. Nagpasabot kini matud niya, nga walay kaso sa balatiang Malaria nga naitala sa maong lalawigan ug dakbayan, sa milabayng 5 ka mga tuig nga “endemic” o gikan sa maong dapit.

Si Mr. Basadre, maoy nagpresentar sa maong buhatan atol sa press forum nga gipahigayon niadtong miaging adlaw agi’g kabahin sa kasaulogan sa “Global Malaria Day.”

Kauban ni Basadre sa gipahigayon nga press forum, sila sa Ms. Mirasol Tuso, ang Global Malaria Control Project Coordinator, Dr. Josephine C. Chua, ang OIC City Health Officer sa Butuan City ug si Jimmy Egay, ang Provincial Malaria Control Coordinator sa Agusan del Norte.

Matud ni Basadre, nga sa Caraga DOH Director Leonita Gorgolon ug Dr. Carmencito Yu, ang Regional Malaria Control Coordinator, atua karon sa kaulohan uban sa mga representante sa LGU ug panglawas sa lalawigan ug syudad sa Surigao City, aron sa pagdawat sa pasidungog.

Gibutyag sa report nga uban sa pag-abag sa LGU, malampuson kaayo ang mga pamaagi sa Surigao del Norte sa pagsumpo sa balatiang Malaria sama sa “early detection and treatment,” “inter-residual spraying sa mga panimalay,” pagpanghatag sa mga chemically-treated mosquito nets, pagpahimulos sa libreng serbisyo sa pagtambal nga gihatag sa pangamhanan ug uban pang mga kampanya batok sa malaria.

Sumala ni Basadre, ang maong kahimtang makab-ot sa bisan asang bahin sa rehiyon, o kaha, mapakubos pasa gidaghan sa mga mabiktima pa sa maong balatian, kon pahimuslan lamang ang libreng serbisyo nga gidalit sa kagamhanan sa pagkontra sa malaria.

AddThis Social Bookmark Button

0 comments

Post a Comment