Pamilya Gi-atsa sa Siargao, 2 ang Naangol  

Duha ang naangol dihang gi-atsa sa usa ka 35-anyos nga mag uuma ang panimalay sa mga Arana didto sa barangay Malinao, General Luna, Siargao Island, Surigao del Norte ala 1:00 sa buntag niadtong Hunyo 4.

Ang mga biktima giilang sila si Marvin Escalera y Arana, minyo, ug si Marlon Escalante y Arana, ulitawo nga parehong molupyo sa barangay malinao, General Luna, Siargao.

Usa ka Larry Maguindanao y Laguay, 35-anyos and edad, maoy gitudlong suspek sa maong hitabo.

Sumala sa pulis report, ang suspek kalit lang nga mibitbit sa iyang atsa ug gisulong ang panimalay sa mga biktima.

Dihang nakasulod, wala nay daghang istorya, gidabo-dabohan dayon niya pagtigbas gamit ang atsa ang duha ka mga biktima.

Naputos gyod intawon sa daghang samad inatsahan ang biktima tungod sa pag-atake sa suspek.

Nadali hinuon sa pagdala ngadto sa Siargao District Hospital, sa lungsod sa Dapa, Siargao Island, aron matambalan ang duha ka mga biktima.

Dali usab hinuon nga ming-responde ang kapitan sa barangay ug gidakop ang suspek, dala na pod ang atsa nga may gitas-ong 33 pulgadas ang gunitanan.

Nagtingkagol na sa selda sa General Luna PNP ang suspek, samtang giandam pa ang tukmang kaso nga ipasaka batok kaniya.

AddThis Social Bookmark Button

0 comments

Post a Comment