Tikas Diri, Tikas Didto
Ang Liquified Petroleum Gas (LPG), maoy labing sayon ug limpiyo nga gamit sa pangluto sa pinobre nga kusina, mao nga daghang panimalay ang naggamit niini karon luyo sa kamahal sa presyo. Kaniadtong Mayo 9, 2008, nagpalit ko og usa ka tangke nga LPG nga ang timbang sumala sa gisulat sa tangke 11 kilos diin ang maong timbang pulos gyud LPG sa presyo nga P670 pa, usa ka bulan ang milabay.
Niadtong petsa 8 sa Hunyo, tungod kay nahurot na man ang sulod sa tangke, nagpalit sab ko og laing tangke nga parehas ra og timbang, 11 kilos, apan ang presyo tag P710.00 na, nga sa ato pa, P40,00 na ang usbaw. Busa, nagtuo ko nga sobra sa P3.00 ang usbaw matag tangke tungod miabot na man kini sa P40.00. Kini kuno nga presyo matod sa gasul dealer, P0.50 pa una ang gipatong nga usbaw sa P3.50 nga gisibya na daan sa Liquified Petroleum Gas Marketers Association (LPGMA).
Buot ipasabot nga duna pay P3.00 nga umaabot nga usbaw sa presyo niining bulana tungod kay kada semana man kuno ang usbaw.
Mao kini ang nakadaot, matod pa ni Energy Secretary Angelo Reyes tungod ka yang maong Presyo gisibya na daan sa LPGMA bisan wala pa magmando og bag-ong usbaw ang gipalitan nila sa LPG Matod ni Reyes, sama ra kuno kini sa usa ka CARTEL nga mao na ang magbuot sa presyo.
Morag tinonto bitaw sab kini nga paagi sa LPGMA tungod kay gikondisyon na daan ang utok sa pumapalit aron dili na moreklamo tungod kay nasayod na daan sa umaabot pa nga presyo. Ang pasumangil, nga kuno miusbaw ang presyo sa world market bisan walay pa gisibya nga usbaw. Kon dautan man ang katuyoan sa pag-anunsyo sa pasiunang pag-usbaw sa presyo, mas labing dautan ang pagbaligya sa LPG nga gikuhaan og timbang apan parehas ra mahal presyo. Gisayonan ka nga imbes 11 kilos ang timbang, 8 kilos na lang ang tinuod? Sa ato pa gikuha na ang tres (3) kilos!!
Sus! pagkalampingasan niining mga tontoha! Mao nga nangugat si Reyes sa dihang nabaniog ang kawat sa timbang luyo sa daan na nag-ilaid sa kalisod nga katawhan. Luyo luyo na ang tikas karon, tikas sa presyo sa bugas, LPG, kuryente, presyo sa produktong petrolyo, buhis sa gobyerno nga gihatag gikan sa katawhan naghago, tikas sa cell phone, sa mga bokal ug uban pa. Mao na ni ang giingon, TIKAS DIDTO, TIKAS DIRI. (Willy Evangelio)
