5 Sikop Sa Illegal Logging Sa Surigao Norte
LIMA KA MGA tawo ang gidakop, samtang 10,700 ka boardfeet ang nasakmit sa mga awtoridad sa gihingsugang kampanya sa gobyerno batok sa illegal logging sa Surigao del Norte ug sa Agusan del Sur. Matud sa flash report nga nadawat ni Chief Supt. Jaime Milla, regional director sa PRO 13 bag-uhay pa lamag, ang hiniusang paglihok sa Philippine National Police (PNP) ug sa Department of Environment and Natural Resources (DENR) miaresto sa lima ka mga tawo nga gipasanginlang nalambigit sa illegal nga pagpamutol sa kahoy, ug pag-transport sa mga forest products.
Padayong gi-imbestigar didto sa San Benito Police Station sa Siargao, Surigao del Norte ang mga dinakpan. Ang ilang mga ngalan hinuon, wala una ibutyag sa publiko, samtang gipadayon pa ang imbestigayon ug giandam pa ang pagpasaka ug kaso ngadto sa korte.
Sumala sa report, ang lima nadakpang namutol ug mga kahoy didto sa Sitio Campinganon, Barangay Mariboc, lungsod sa San Benito. Nasakmit sa mga pulis ang usa ka chain saw, chain guide, tool box ug 185 board feet nga ginabas nga mga kahoy.
Sa lahi nga operasyon, nasakmit sa mga pulis sa Sison, Surigao del Norte ang 400 ka board feet nga forest products nag gibiyaan didto sa Barangay Ima, sa lungsod sa Sison.
Sa Agusan del Sur, hiniusang elemento sa Bunawan CENRO-Cuevas Monitoring Station ug 140 3rd Provincial Police Mobile Group pinagulohan ni Forester Fortunato Reyes, Jr. ug Senior Police Officer 1 Vidal Dumaloan, nakasakop usab sa usa ka Fuzo truck hauler nga kargado ug 4,528.32 board feet sa illegal nga pagputol nga mga kahoy didto sa Crossing cuevats, Trento town, Agusan del Sur.
Sa report gibutyag nga ang driver, nga giiling si Gilbert De La Cruz, walay gikapresentar nga mag papeles nga magmatuod sa legalidad sa kargamiyentong forest products.
