Caraga PNP Nagwarning: NPA Mandagit ug Opisyal Aron Ibaylo sa Nadakpan nilang Sakop

"Kinahanglan magmabinantayon ning mga panahona ang mga sakop o opisyal sa kapolisan ug mga kasundalohan, apil na ang mga local government officials ug mga opisyales sa ahensya sa kagamhanan, ilabi na niadtong mga nadestino sa layo ug hilit na mga lugar."

Kini ang pasidaan ni Caraga PNP Regional Director Chief Supt. Jaime E. Milla human sa nahitabong pagsulong sa Municipal Stations sa Dapa, ug General Luna, sa Siargao Island, Surigao del Norte, ug sa clearing operations sa mga sundalo ug kapolisan.

Sumala ni Milla, posibleng mohimo ug mga pagpangdagit ang mga sakop sa NPA, aron nga ang ilang madagit maoy ibugti unya alang sa pagpabuhi sa ilang mga sakop nga anaa karon sa kamot sa kasundalohan ug kapolisan.

Sumala sa opisyal, nasayran na nga mohimo gayud ug mga lakang ang rebeldeng grupo, aron nga ang ilang mga kaubanan nga nangadakpan, dili gayud magapabilin sa kamot sa kapolisan o militar.

Matud ni Milla, nga kinahanglanon gayud ang kanunay nga pagkamabinantayon ug pag-amping sa mga nangatungdanan.