Human Gisulong sa NPA: Reg’l Mobile Police Sa Siargao

Plano ni Caraga PNP Director CSupt. Jaime E. Milla nga butangan ug kompaniya sa Regional Mobile Group ang sa Siargao Island, ilabi na sa Dapa ug sa General Luna.

Matud sa opisyal, ang pagbutang ug dugang pwersa sa kapolisan sa Siargao dako’g ikatabang sa pagsiguro sa kalinaw ug kahusay sa maong dapit.

Kini dili lamang aron sa pag-santa sa samang panghitabong pagpanulong sa duha ka mga municipal police stations, kondili aron may klarong makabantay gyod sa tibuok palibot sa isla sa Siargao nga giila na karong Tourist Island.

Atol sa pagsulong sa mga armadong NPA didto sa Dapa ug General Luna, ubay-ubay nga mga armas ug mga gamit ang nakuha sa kaaway, ug gipanguba usab ang pipila ka mga buhatan sa kagamhanan apil na ang mga tore sa komunikasyon. Duha ka mga pulis pod ang namatay, usa kanila opisyal ug tulo ang nasamdam. Hinuon, ang kapolisan ug kasundalohan sa ilang counter operation, miasoy nga labing menos, 12 ka mga sakop sa NPA ang nangamatay, 25 usab ang nasamdam ug 15 ang mga nasikop.

Sumala ni Milla, ang pagbutang ug puwersa sa seguridad sa Siargao makapalig-on pag-usab sa kumpyansa sa mga bisita ug mga turista nga posibleng mibati ug kahadlok human sa nahitabong pagsulong sa mga rebelde.

Matud sa heneral, nga ang dapit dili lamang ilado dinhi sa nasud kondili, apil na usab sa gawas tungod sa nabantog na nga “surfing area” sa lungsod sa General Luna.