Editorial: Honorable Mahilig
Maayo ang balaodnon nga gipasaka ni Buhay party-list Kongresman Irwin Tieng nga nagtumong sa pagsilot hangtud unom ka tuig ug multa hangtud P500,000 kang bisan kinsa nga naghupot lamang ug usa ka video clip nga nagpakita sa pribadong parte sa lawas apil na ang pakighilawas sa managhigugmaay. Kung maaprubahan ang maong balaodnon, pagasilotan kung may sex video ang imong cellphone ug imo kining gipasundayag ug gipaambit sa uban.
Tinuod, daghan na gyud ang nabiktima niini sama niadtong anaa sa klase-klaseng sex scandal video nga naka-CD na diin nabulgar gyod ngadto sa publiko ang mga naghubo ilang lawas o nakighilawas. O diba kaha kadtong na post na sa mga pornograpiyang websites sa Internet.
Karong panahona, dali ra gyud mokatag ang mga hulagway ug video recording tungod ra pod sa pagbutho sa mga bag-ong teknolohiyas sa komunikasyon sama sa cellphone ug internet. Kining pagpakatag nagsugod sa pagkuha sa hulagway o video sa mga kolokoy nga patagong migamit ug kamera, digicam o cellphone nga may camera aron kuhaan ug hulagway o video ang mga sensitibong parte sa babaye o di kaha panahon sa ilang pakighilawas.
Aw, may mga sex scandal usab diin ang video gikuha na may pagtugot sa babaye. Apan dili kay sayon ang maong pagtugot. Mahimong hubog o gihubog sa mga kolokoy ang biktima, o di kaha naka-droga o gipa-droga sa mga dukirok o dib a kaha aron motilaw ug usa ka adbenturistang pantasya diin sila na ang makit-an sa salida nga way saplot nga mga inosenteng aktor ug aktres.
Daghan ang mga kaso sa mga sex video nga mikatag tungod kay nadisgrasya kay nawala man ang cellphone o ang USB flask disk diin anaa ang video sa pakighilawas sa usa kauban sa iyang girlfriend sama sa Iloilo sex scandal video nga gipapelan sa usa ka maestro ug sa iyang batan-ong estudyante.
Grabe ang bag-o pa lang mikatag nga Dasmariñas Sex Scandal diin usa ka kolehiyalang babaye ang gitabangan ug lugos sa upat ka lalaki ug wa pa makontento sa krimeng gihimo gi-videohan pa gayud samtang gihimo nila ang pagpanglugos, ug wa madugay kini mikatag sa mga cellphone ug siguro anaa na kini sa Internet karon. Usa kini ka doble nga pagpanglugos! Kaluoy sa batan-ong babayeng biktima kansang kinabuhi ug kaugmaon gidaut na sa mga “sakop ni satanas!”
Tungod kay wa pay partikular nga balaod nga mogukod ning krimen sa pagpakatag sa mga hulagway ug video clip, di pa dayon magukod ug ensakto ang mga nakahimo niining salaod.
Husto lamang gyod ang pagpasaka sa balaodnon sa malaw-ay nga video clip. Husto lang nga gukdon dayon sa balaod ang simpleng pagpakaylap sa malaw-ay nga video clip. Maayo gyod kining ingon niini nga lakang kay bisag wa pa nimo gipaambit sa uban, gi-bawal na kini, kung ang balaodnon ni Cong. Tieng (House Bill No. 4315) maaprubahan sa Kongreso.
Apan posible ba kahang maaprobahan kining balaodnon ni Tieng, nga tataw man kayo nga usa ka macho institution ang atong kasamtangang Kongreso? Di ba kaha ang debate niini mo-abli lang sa burlesk King Scandal nga bisan giingong serado na ang isyu, apan padayon kining naka-preso sa kanhi Bombo broadcaster nga si Alex Adonis kinsa nahukmang sad-an sa kasong libelo?
Seguro una tuki-on didto sa Kongreso kining balaodnon, himoon una ang usa ka roll call ug usa-usahon pagtan-aw kung wa bay sulod nga sex scandal video ang mahalon nga cellphone sa atong kongresman. Dakong posibilidad nga ang ilang mga cellphone nga may camera may usa o duha niini ang malaw-ay nga eksena.
Aw, hinuon, nagtan-aw sa Kongreso ang mga lungsoranon. Kung unsa ang ilang mamahimong aksyon sa balaodnon ni Tieng, nasiguro nato nga makabaton dayon sila ug hingpit nga konklusyon. Maklaro gayud kinsa sa mga kongresista ang---HONORABLE MAHILIG!
