Editorial: Maayo Pay Bampira

Kung gustohon, mahimo man lagi diay.

Apan mora’g dakong tamparos ang nahitabong pagpakunhod sa presyo sa krudo ug tag P1.50 kada litro tungod lang sa hangyo sa Pangulo.

Tan-awa, ang gobyerno nga labing gamhanan dinhi sa YUTA NGA ATONG GIPUY-AN (Pilipinas), mao karon ang nangilyupo ug halos moluhod ngadto sa mga kompaniya sa petrolyo aron lang paubsan ang presyo sa krudo. Ug kung dili pa kaha tungod sa tinguha sa gobyernong Arroyo nga magpa-POGI, dili unta kini mohangyo sa mga negosyante ug petrolyo.

Tsk, tsk, tsk,… kung wala pa unta giputol sa gobyerno ang control niini sa negosyo sa petrolyo, wala na unta nagpa-baga ug nawong ang kagamhanan aron lang mohangyo sa mga negosyante. Kung giwagtang pa usab unta ang OIL DEREGULATIO LAW, ang gobyerno unta ang magmandar sa presyong maki-angayon ug dili kay ang presyong sobrang PANGGANANSYA UG MAKABUHONG sa mga magpapatigayon. Kung wala pa unta ang balaod nga gitawag ug OIL DEREGULATION, maklaro unta dayon ngano nga ang mga kompaniya kada tuig modeklara ug ganansyang milyon-milyon, samtang sa kada usbaw sa presyo, mobandilyo nga dako pa ang alkanse nga ilang bawi-onon.

Malipayon gayud nga mi-anunsyo sa Press Secretary Jess Dureza sa maong pag-rollback. Apan luyo sa iyang pahiyom nagpahipi ang dakong kabalaka sa mga taga transportasyon ug sa kinatibuk-ang katawhanng Pilipinhon.

Sayod man god ang tanan nga ang gipasiatab karon ug ROLLBACK, temporaryo lang. Ug inig buhat na pod sa mga negosyante ug petrolyo, siguradong PASPAS ANG TANAN nga agi sa rollback, u gang mopuli mao na pod ang MAKUTAS nga palas-anon. Pipila lang ka adlaw kining maong ROLLBACK ug latoson na pod kita sa laing round sa umento.

Bisan ang Pangulo nahibalo nga ang gipasiatab karon nga rollback sa iyang gobyerno, bale-wala, Wala kini kalainan sa tag P500 nga ayuda para bayad sa koryente o para pagana sa pobre nga sa pagdawat sa pobre dako ug ngisi , inig liko sa kanto, wan a. Dili gayod kini mao ang solusyon.

Oo, wala kiatay mahimo ka yang presyo sa petrolyo gisandig man gyod ngadto sa world market—nga kung magmahal ang presyo didto, magmahal usab dinhi sa ato.

Apan dakong butang gayod kung dili na “pasobrahan ug karga” ang OVERLOADED NA DAAN nga presyo sa krudo ug gasoline. Daan na’ng mahal ang balor sa petrolyo gikan sa world market, unya pag-abot dinhi singitan pa sa “panagat sa gobyerno” (RVAT ug uban pang buluhisan), mosamot gayod nga ang magpas-an nga Pilipinhong katawhan mataki-ang ug mokamang. Pagka-walay puangod gayod.

Nagsukarap na ang katawhan tungod sa sobrang kabug-at sa gipas-an nga kalisdanan, unya gipatongan pa gyod sila sa gobyerno pinaagi sa RVAT. Pastilan, anemic na mga tawo, gisigehan pa gyod ug suyop ang ilang dugo (piaagi sa buhis) sa gobyerno. Maayo pa ang bampira kay kung mamatikdan nga ang dugo molabnaw na, moundang na pod sila sa pagsuyop, pero ang RVAT, “tila walang pagka-bundat.”