Minero Hagbong sa Tunnel

Tugpa sa Caraga Regional Training Hospital ang usa ka minero human kini nahagbong ngadto sa usa ka tunnel matapos usab kining nakuyapan didto sa Brgy. Mat-i, Surigao City, duol gayod sa Watershed Area.

Sa report sa RMN news website kagahapon, giila ang biktima nga mao si Edwin Olan-Olan, 34-anyos and edad, taga Brgy. San Juan, Surigao City.

Sumala sa taho, alas 11:00 ang takna niadtong miaging gabii, misulod sa tunnel ang biktimang si Olan-Olan kay nangiyawat nga makukuha ug bulawan.

Pero samtang didto sa ilawonm sa tunnel, naglain ang paminaw nini sa lawas, busa gamit ang pisi, misaka pagawas sa tunnel ang biktima.

Pero samtang anaa na kini sa tunga-tunga, nga giingong 20 piyes pa ang gilay-on, kalit kining nakuyapan, hinungdan nga nahagbong kini paubos sa tunnel.

Nagkasamad-samad ang lawas ug ulo sa biktima, busa gidali kini sa pagdala ngadto sa tambalanan.

Hangtud sa pagsulat, wala pay follow up report labot sa aktuwal nga kahimyang sa biktima didto sa Caraga Regiona Hospital, sa Surigao City.