Mangrove Fishing na usab sa Siargao

Dili lang Surfing ug Game fishing, mangrove fishing na usab ang isla sa Siargao karon.

Karong bag-o lang gilusad sa lokal nga mga opisyales didto ang “Mangrove Fishing Project”, usa ka kalihokan nga gitumong pagpakusog sa turismo sa Siargao.

Sumala ni Congressman Francisco Matugas (1st district Surigao del Norte), ang Mangrove Fishing Project siguradong mamahimong dugang atraksyon na pod sa mga turista nga makadugang sa trabaho alang sa lokal nga katawhan.

Ang nag-unang mga opisyales sa lalawigan pinangulohan ni Gov. Sol Matugas, ug sa Bureau of Fisheries and Aquatic Resources (BFAR) mitambong sa paglusad sa proyekto didto sa lungsod sa Del Carmen.

Gisulti ni Matugas nga giandam pa niya ang uban pang panginahanglanon sa proyekto aron gyod nga mamahimong dakong atraksyon sa turista ang mangrove fishing.

Gitakdang molarga si Matugas paingon sa Darwin, Australia, aron tan-awon ang sikat kaayong mangrove sportsfishing didto aron makuhaan ug igong kahibalo nga magamit alang sa lokal nga proyekto.

“Darwin, is one of the cities in the world in mangrove fishing. I want to visit there along with Del Carmen Mayor Alfredo Coro, Jr. and our Tourism Officer for we want to study their style and strategies,” sulit ni Matugas sa usa ka interbyu.

Ang Siargao adunay 8,000 ektaryas nga mangrove.

“We are the second largest mangrove area in the country and this must also be developed.” Dason sa kongresistang taga Dapa.