Suspek Sa Hit & Run Sa Surigao Dakpan Na
Nadakpan na gyod ang driver sa Multicab nga giingong naka-Hit and Run sa usa ka lalaki sa Kilometer -1, Villa Corito Subdivision, Surigao City di pa dugay.
Sa report sa RMN News Website kagahapon giila ang suspek nga mao si Arnel Comboy, driver sa Multicab nga may plate number LYD 142.
Kahinumduman nga kaadlawon niadtong Miyerkules Hulyo 7, nakit-an na lang sa tunga sa karsada ang biktimang si Roberto Cudillo Revil, 38-anyos ang edad nga nabuak na ang ulo ug migawas pa gyod ang utok niini.
Gidala unta ang biktima sa Craga Regional Hospital apan gideklara kining Dead on Arrival. Sa imbestigasyon sa mga awtoridad,nasayran nga angbiktimang si Revil, nag-angkas sa usa ka motorsiklo nga gimaneho ni Dominic Arayan Leyson.
Ang report nag-ingon nga samtang nagdagan sa National Highway ang motor, kalit lang nilang gika-engkwentro ang Multicab nga kalit pod nga nag-overtake, hinungdan nga nadasmagan ang motorsiklo.
Ang duha ka sakay sa motor, pulos naka-angkon ug mga bun-og ug mga samad.
Gidugang sa RMN news report nga napasakahan na ug kasong Reckless Imprudence Resulting to Homicide ang suspek. Nagbangutan karon ang mga nabiling pamilya sa biktima, ilabi na nga gagmay pa ang unom ka mga anak niini.
