Pulis sa San Francisco gipatay sa Surigao City

DIRETSO PATAY ang usa ka pulis human kini gipusil sa duha ka wala mailhing KILLERS didto sa Sitio Alang-alang, Barangay Ipil, Surigao City alas 8:30 ang takna niadtong us aka gabie, Marso 28, 2011.

Ang report nag-ila sa biktima nga mao si PO3 Charlou Celeste Dionaldo, PNP member sa San Francisco Municipal Police Station, San Francisco, niining probinsya.

Sa imbestigasyon sa Pulis-Surigao nasayran nga ang biktima, molakaw na unta gikan sa iyang pinuy-anan, ug sa dihang gipaulanan siya ug bala sa duha ka mga armado tumong sa lain-laing parte sa iyang lawas.

Wa na madala sa tambalanan ang pulis ug nabugtuan dayon kini sa iyang gininhawa, matud sa report.

Wala masayri unsay motibo sa maong pagpamusil. Nagpadayon pa ang imbestigasyon sa Pulis-Surigao ning maong kaso.