Jail Guard gipusil sa Jail Guard

Tugpa sa hospital ang usa ka Jailguard nga gipusil sa usa ka Jail Officer didto sa compound sa Sub-Office, sa Dapa District Jail, sa lungsod sa Dapa, Surigao del Norte.

Subay sa report sa RHQ Public Information Office, ang biktima giilang si Jovito Litang y Espina, 47-anyos, minyo ug usa ka Provincial Guard sa Dapa District Jail nga taga Espina Extension, Brgy. Taft, Surigao City.

Si Jail Officer 1 (JO1) Joel Joseph Mengote y Rosales, 39-anyos nga taga Brgy. Poblacion 1, Dapa, Surigao del Norte, kuyog ang usa ka JO1 Virnel Espejon y Pomoy,nga taga Sta. Monica, Surigao del Norte ang gitudlong mipusil sa biktima, gamit ang usa ka caliber .38 revolver.

Nasamdan sa iyang walang sampot ang biktima, busa gidali sa pagdala ngadto sa Dapa District Hospital, apan wala maduagy, gibalhin ra pod kini dayon ngadto sa Miranda Family Hospital, sa Surigao City. Ang mga suspek boluntaryo hinuong miampo ngadto sa Dapa Municipal Police Station, apil na ang caliber .38 revolver nga may serial number E218163, lima ka bala ug usa ka basiyo.

Giandam na karon ang mga papeles alang sa pagpasaka sa tukmang kaso batok sa mga suspek.