Surigao Apil Pod sa Transport Strike

APIL USAB ang Surigao sa TIGIL PASADA o Transport Strike nga gitakda karong adlawa.

Sa report sa Philippine Information Agency (PIA) sa Surigao del Norte gibutyag sa Pinag-Isang Samahan nga mga Tsuper at Operators Nationwide (PISTON) Surigao del Norte Chapter nga mosalmot sila sa nationwide transport strike karong adlawa, Marso 31, 2011, isip protesta sa nagpadayon pagtaas nga presyo sa produkto sa petrolyo.

Sukwahi hinuon sa anunsyo sa PISTON SA MANILA nga nagklaro nga dili sila mag-STRIKE karong adlawa kondili magTRANSPORT CARAVAN lamang. Hugot nga nagbaod ang Land Transportation Franchising and Regulatory Board (LTFRB) nga mameligrong makanselar ang mga prangkisa sa mga sakyanang de pasahero nga mosalmot sa strike.

Si PISTON Chairman Joel Albrando, miingon sa report nga ang mass protest magsugod alas 5:00 sa buntag karong adlawa ug tapuson nila alas 5:00 pod sa hapon.

Sumala ni Albarando, ang local federations ug mga operators sa mga tricycles, multicabs ug vans, gilauman nga musalmot sa strike.

Ang ubang militanteng grupo, sama sa Gabriella ug Kadamay-Surigao del Norte Chapter, gipaabot pod nga mu-entra sa welga.

Si Albarando midugang nga ang ilang grupo nanawagan sa Aquino government nga ibasura na ang oil deregulation law ug tangtangon na ang value-added tax (VAT) ngadto sa mga oil products.
Ang presyo sa mga produkto sa petrolyo nagpadayon pagtaas ug misamot pa gyod sa pag-ulbo sa KAGUBOT sa Middle East.

Giklaro hinuon kagahapon ni Surigao City Mayor Ernesto Matugas, ngga ANDAM NA ANG CONTIGENCY PLAN sa city government alang sa STRIKE karon.

Bisan ang Pulisya hugot nga gimanduan nga dugangan ang ilang police visibility aron mamentinar ang kalinaw ug kahusay.

Mohatag ug libreng kasakyan ang City Engineering Office alang sa mga ma-stranded nga mga pasahero.