Sakop sa sindikato sa ilad sa Manila sikop sa Surigao

Nadakpan gyod ang usa nga gituohang sakop sa DUGO-DUGO GANG, usa ka ngilngig ug gikahadlokang sindikato sa mga mangingilad sa nasod Pilipinas, sa gilusad nga entrapment operation sa Surigao City.

Matud sa police report, ang dinakpan giilang mao si Ronald Bandoy Angoc, 36-anyos ang edad, usa ka security guard sa RD Pawnshop, Surigao City nga kasamtangang nagpuyo sa Payawan II, Brgy.

Luna, Surigao City. Giingong lumad sa Tubajon, Dinagat Islands ang dinakpan ug gituohang sakop kini sa gikaintapang Dugo-dugo gang, nga matud sa Pulisya, usa ka syndicated organized crime group, nga nangbiktima ug inosente sa tibuok nasod.

Ang modus sa grupo mao ang paggamit ug sikat nga mga ngalan sa tawo sa usa ka lugar, sa pag-ilad sa ilang mga biktima. Nadakpan ang suspek tungod pod sa ML Lhuillier Surigao City branch sa San Nicolas Street.

Nasayran nga ang suspek mipaila sa iyang kaugalingon ngadto sa iyang biktimahon unta nga si Norma Alngohuro, nga usa sa mga barangay captain sa Tangub City gamit ang ngalang Jenny Tan (usa ka sikat nga tawo didto).

Ang suspek mihangyo dayon nga moutang ug P20,000 ug ipadala kini pinaagi sa ML Kwarta Padala.
Pero ang biktima, mikontak sa matuod nga Jenny Tan, nga hugot gyud nga namalibad nga may kalabutan kini sa transaksyon.

Gikasabotan dayon ang usa ka entrapment operation.

Ang suspek, miusab dayon sa “recipient” gikan sa Margarita S. Pacot sa Tangub City ngadto sa ngalang Ronald Angoc sa Surigao City. Ug tuod man, dihang giclaim na niya ang padala pinaagi sa M. Lhuillier, Surigao City branch, nasakpan gyod kini.

Gipailwon dayon kini sa INQUEST CASE, sa pagsupak sa Article 315-Swindling (estafa) ang suspek u gang iyang mga kaubanan nga giila lang sa ngalang Margarita S. Pacot, nga may address sa Tangub City.

Ang kaso gipasaka dayon sa City Prosecutor’s Office sa Surigao City.

Gitanggong unsa sa selda sa Surigao City Police Station ang dinakpan, samtang gipaabot ang commitment order niini ngadto sa BJMP sa Brgy. Silop, Surigao City.