63-ANYOS NGA BIYUDO GIPATAY

Alegria, Surigao del Norte – Patay ang usa ka 63-anyos nga biyudong mag-uuma, human kini gipusil sa usa ka wala mailhing suspetsado, didto sa Purok 4, Brgy. San Pedro, Alegria, Surigao del Norte alas 7:25 sa kagabhion niadtong miaging adlaw.

Ang kapolisan sa Alegria Municipal Police Station, miila sa biktima nga mao si Catalino Pito y Coronel, 63-anyos, molupyo sa San Pedro.

Sa imbestigasyon sa kapolisan sa Alegria, nasayran nga si Pito naglakaw gikan sa iyang tindahan paingon na ngadto sa iyang pinuy-anan sa dihang gipusil siya sa lipot nga paagi, sa wala pa hiilhing suspetsado.

Ang biktima nakabaton sa upat ka mga samad agi sa pinusilan sa nagkadaiyang bahin sa iyang lawas, ginamit ang wala pa nadetermina nga matang sa armas de fuego. Patay ang biktima diha-diha.

Ang suspetsado daling milayas paingon saw ala pa hisayring direksyon, human sa maong panghitabo.

Ang kapolisan sa Alegria padayon pang nag-imbestiga sa maong panghitabo. (Noel Najarro/Periodico Butuan)