ADLAW NI SAN JUAN: BATA HAPIT MAMATAY, 18-Anyos Nanablig Ug Tubig Preso!

PRESO ang usa ka 18-anyos nga batan-on tungod kay hapit mamatay ang usa ka bata nga iyang gisabligan ug tubig atol sa Pista ni Senyor San Juan didto sa Barangay Sabang, Surigao City alas 11:20 sa buntag kagahapon, Hunyo 24, 2007.

Matud sa Pulis report, gitunol ngadto sa pulisya ni Richard Mozar y Abis, 32-anyos ang edad, minyo, empleyado sa SEC nga taga Purok Makiangayon, Espina Extension, Barangay Taft, Surigao City, ang usa ka Jolendo Escudero y Lisondra, ulitawo ug walay trabaho nga taga Purok 3, Barangay Sabang.

Sa iyang asoy sa pulisya, gisumbong ni Mozar nga samtang nagsakay siya ug motorsiklo kuyog sa iyang anak nga si Cloie Fern Mozar y Crabajales, nga usa pa ka menor de edad, kalit lang kining gisabligan ug tubig sa batan-ong si Escudero.

Tungod sa maong pagsablig, wala makaginhawa ang bata ug hapit mamatay.

Tungod niini, gidala ni Mozar ngadto sa Pulisya ang batan-ong si Escudero aron patubagon sa nahimo niyang sala atol sa adlaw ni San Juan. (Jodian Jayme/Periodico Surigao)