USA ANG PATAY sa pagdasmag sa usa ka XRM single motorcycle ngadto sa usa ka tricycle atubangan mismo sa Caraga Regional Hospital sa dalang Rizal, Surigao City alas 6:00 ang takna sa sayong gabie niadtong Hunyo 24, 2007.
Matud sa Pulis report, nagdagan sa dalang Rizal ang usa ka motorized tricycle nga may body no. SC-1485 nga gipanag-iya ni Vicente G. Becerro sa 1773 Borja Street, Surigao City ug gimaneho ni Marcelo M. Lucero Jr. sa Villa San Miguel, Surigao City.
Wala damha, gikasugat niini ang usa ka Honda XRM KS-1756 nga gipanag-iya ug gimaneho sa usa ka Joey Japatingga sa Narciso Street, Surigao City.
Ang driver sa tricycle nagsulti nga pag-abot niya atubangan mismo sa Caraga Regional Hospital, mipasiga siya sa iyang wala nga signal light timaan sa iyang tinguha sa pagsulod ngadto sa tambalanan.
Apan samtang naghinay-hinay siya pagliko, aksidenteng nadasmagan ang walang bahin sa tricycle.
Tungod sa impact, natumba ang XRM hasta napod ang driver niini nga gidali sa pagdala ngadto sa tambalanan.
Wala madugay, gibalhin kini ngadto sa Surigao Medical Center apan pipila lang ka minutos ang milabay gitaho nga nabugtoan kini sa gininhawa.
Nagpadayon pa ang imbestigasyon ning maong kaso. (Marx Rev Buenavidez/Periodico Surigao)
