AKYAT BAHAY SIKAT POD SA DIGOS CITY

Sikat pod sa Digos City ang Akyat Bahay Gang.

Kini bisan kung nagpadayon pod ang pagpang-salbids sa mga tawong may rekord sa kawat sa dakbayan.

Kagahapon, usa ka Marife Tobis Panugan, 32, dalaga, self-employed ug residente sa Old Slaughter Drive, Abella Subdivision, Digos City, ang misumbong sa Digos City nga gisulod sa wa mailhing kawatan ang ilang balay ug nagmalampuson kini sa pagdagit sa P20,000.00 nga cash nga iya sa iyang 52-anyos nga inahan.

Sa sumbong ni Marife, iyang giingon nga mga bandang alas 2:00 sa kabuntagon, siya ug ang iyang inahan nga si Mary Panugan, apil na ang iyang igsoong lalaki nga si Roy Panugan nakamata tungod sa kasikas.

Mao na lay ilang nakita ang usa ka lalaki nga midagan pagawas sa ilang balay agi sa pultahan sa kusina ug abtik kining milayat sa koral tabok sa pikas nga lote sa ilang silingan.

Sa paghiling sa ilang butang, dako na lang ang kadismaya sa ilang inahan human nadiskobre nga ang iyang salapi nga P20,000.00 nga gisulod sa bag, nawagtang na.

Ang intelligence operatives naghimo na ug lakang sa pagsubay sa pundok sa kawatan nga padayon karon nangatake sa mga residente sa syudad. (Nilo P. Mercado)