Surigao City (June 15) – Gitagalan ug 72 oras lamang ni Surigao City Mayor Alfonso Casurra ang 21 ka mga naglangkub sa Board of Election Inspectors (BEI) sa syudad sa Surigao aron tin-awon ang nabaniog karon nga istorya sa DAGDAG-BAWAS sa Surigao City atoll sa miaging piniliay.
Sumala sa kampo ni Mayor Pons Casurra, ang giingong DAGDAG-BAWAS nahitabo sa precinct number 0283A sa Brgy. Luna, Surigao City diin ang Mayor nakakuha kini sa 50 botos apan gibutang sa papel (in words) 30 botos lamang.
Sa precinct number 0022A sa Brgy. Washington ang nakuha ni Mayor Casurra 62 botos apan gibutang sa papel (in words) 52 botos lamang ug alkanse si Casurra sa 10 botos diin ilang naobserbahan nga ang naalkanse nga 10 botos ni Casurra natakop kini sa iyang kaatbang nga si Nitoy Matugas nga sa kinatibuk-an 78 botos ang nakuha apan gipahimutang diri nga 88 botos ang nakuha diin ang lugi nga 10 botos ni Casurra didto natakop kang Matugas.
Ang report nagdugang nga sa precinct number 0120A ug 0120B sa Brgy. Canlanipa, si Casurra nakakuha kini sa 98 botos apan ang nahisulat sa papel (in words) 58 botos lamang ug nalugi siya ug 40 botos. Sa precinct number 0264A ug 0264B sa Brgy. Lipata si Casurra nakakuha kini ug 136 botos apan gibutang didto (in words) 106 lamang ka botos ug siya lugi ug 30 botos.
Sa precinct number 0250A sa Brgy. Ipil si Casurra nakakuha ug 28 botos apan ang gibutang didto 23 botos lamang ug alkanse siya ug 5 botos. Sa precinct number 0189A ug 0190A sa Brgy. Balibayon si Casurra nakakuha ug 129 botos apan sa gibutang (in words) niini 124 lamang ka botos ug nawala ang 5 ka botos. Sa precinct number 0100B sa Brgy. Taft, si Casurra walay nakitang diperensya sa iyang boto didto sa tally apan naobserbahan nga ang kang Matugas sa tally nakakuha lamang kini ug 34 botos apan gipahimutang didto ang 39 botos ug gidungagan kini sa pabor nga 5 botos.
Ang report sa radio dxKS nagtug-an nga pito sa kinatibuk-ang mga presinto nga na-obserbahan sa kampo ni Mayor Casurra ang girefer na ngadto sa Commission on Election (COMELEC).
“Tinuod man kana nga nasakitan kita sa dagdag-bawas and nahibalo naman kamo nga tinuod kining nahitabo. Sa akong kabahin, ako ng gisulatan ang Chairman, ang Poll Clerk ug ang Third Member sa BOI. And I have given them 72 hours to explain in writing ngano dili sila pasakaan ug kaso,” si Casurra nag-ingon.
Gipasabot ni Casurra nga kung dili sya makuntento o makumbinser sa mga mamahimong ekplenasyon sa 21 ka mga BEI, iya gyud kining pasakaan ug kaso sa pagpanlimbong niadtong milabay nga piniliay. (Periodico Surigao)
