EDITORYAL (Hunyo 18, 2007): PANALIPDAN UNTA KITA SA KAHITAS-AN!  

SUGOD SUNOD SEMANA, manumpa na sa ilang tagsa-tagsa ka mga katungdanan ang mga bag-ong napili nga mga opsiyales local sa tibuok nasod.

Dinhi sa ato sa isla sa Mindanao, nagkapuliki na ang mga mananug sa eleksyon sa pagpangandam alang sa ilang oath-taking nga giilang labing dakong adlaw sa ilang tagsa-tagsa ka mga kinabuhi, ilabi na gyod sa bag-o pang nahimong public officials.

Dakong pista gain ang gihuna-huna nga mahitabo niining atong mga nakadaug nga mga opsiyales.

May mga reports gain nga nagtumbok nga milyones ang giplanong gastohon alang ning labing dakong okasyon sa kinabuhi sa mga taga LGUs. Ang uban, nangimbita pa gain ug artista atol sa inagurasyon.

Maanindot nga mga eksena. Makabuhong nga talan-awon. Apan kinsay pagastohon?

Maarang-arang kung solo gastos sa mga mananaug ang PISTA sa inagurasyon. Maayo gyod kung dili hasul-hasolon ang panudlanan sa lungsod.

Pero kung IPAPAS-AN SA KAGAMHANAN ang milyones nga galastohan sa inagurasyon, karon pa lang makaingon kitang, DIMALAS KA ‘BAYAN’!

Kung sentabo na usab ni Juan de la Cruz ang daginaton, karon pa lang, way pihig-pihig kitang moingon: LAING BUAYA na pod diay ang nakasulod sa gobyerno!

Klaro man god kayo karon ang pag-ilaid sa kalisod sa yanong lungsoranon. Wala malilong bisan sa bag-ong mga opisyales ang makalolooy nga kahimtang ekonomikanhon… busa ang SOBRANG GASTOS sa mga okasyon sama sa inagurasyon, dakong tamparos gyod sa nawong sa GUTOM nga mga lungsoranon.

Apan lagi kay sila na man ang anaa sa puwesto, sila na nag hawod, wala nay mahimo ang lungsod. Pero dili hikalimtan, nga ang BUAYA sa katungdanan gikalagotan kana sa katilingban.

Hinaut lang nga sa bag-ong mga mangatungdanan, WALA KANILA SI BUAYA. Atong iampo nga si Buaya dili tugotang makasagol o maghari pag-usab dinha sa bag-o natong mga nangatungdanan.

Panalipdan unta kita sa Kahitas-an!(Periodico Surigao)

AddThis Social Bookmark Button

0 comments

Post a Comment