ILAD SA INTERNET NAGPADAYON, Hasta sa Surigao Nanggawas ang Ilad

Surigao City (19 June) - Ang pagpangilad di lang kay nagapadayon, nagkadaghan og nagkakusog pa gyod kini.

Bisan daghan na ang nangadakpan didto sa laing nasod, apil na ang 100 ka mga nasikop didto sa Amsterdam, Netherlands, nagpadayon gihapon ang pagpangilad pinaagi sa internet.

Bisan sa Surigao City, daghan na pod ang nakadawat ug mga email nga klarong pangilad lamang.

Nasayran sa Periodico Surigao nga apil sa pagpangilad ang pagpaila sa internet nga usa ka abogado o kaha nagtrabaho sa bangko o opisyal nga taas ang puwesto.

May pagpangilad pa usab nga maganunsyo kunohay nga dunay mag-asawang Filipino nga namatay sa usa ka aksidenteug wala nay mga paryente nga maka-angkon sa kuwarta sa namatyan.

May pangilad pod nga magtanyag ug tabang, apan sa ubos ipaklaro pod nga may bayronon nga processing fee.

Ang mangingilad, mohatag pa sa iyang numero sa telepono aron kunohay kontakon kini sa ilang biktima.

May pangilad pod nga maganunsyo nga ang e-mail address sa tagtungod maoy mananaug sa electronic raffle draw.

“Kung naa mo nadawat nga pareha ani nga tanyag sa inyong internet, ayaw gyod mo pagpabiktima,” matud sa warning sa publiko.

Ang maoing pagpangilad, gawas nga gikabalak-ang mobiktima ug salapi, gikahadlokan pa god nga nagdala ug virus sa computers. (Marx Rev Buenavidez/Periodico Surigao)