Ulitawo Gipatay sa Bana sa Kalive-in

Placer, Surigao del Norte (June 20) – USA LANG ka bala sa kalibre .45 nga pistola ang mitapos sa kinabuhi sa 24-anyos nga ulitawo nga gipusil sa bana sa babayeng giingon nga iyang katipon didto sa Brgy. Ipil, Placer, Surigao del Norte alas 9:30 ang takna niadtong miaging gabii.

Ang taho gikan sa Placer ug Tagana-an Police Stations, miila sa biktima nga mao si Rogelio Escora y Perodo, Jr., 24-anyos, ulitawo ug molupyo sa Ipil, Placer.

Usa ka Reynaldo y Chato, alyas “Tat” 39-anyos inubanan sa duha pa ka mga kaubanan nga wala pa hiilhi, maoy gitudlong suspek sa maong pagpamusil.

Sumala sa report, ang suspek taud-taud na nga naglungot-lungot ug nangita gyod ug higayon aron patyon ang biktima tungod usab sa matud pa pag-ilog sa biktima sa asawa sa suspek. Wala hinuon nganli sa report ang giingong babaye.

Niadtong miaging gabie, natiyempuhan ra gyud sa suspek ang biktima, busa gipusil dayon kini tumong sa dughan niini.

Ang biktima, gisulayan pa pagdala ngadto sa Placer District Hospital, apan gideklara sa mga mananambal nga patay na sa paghidangat didto.

Nakuha sa kapolisan gikan sa dapit nga nahitaboan, ang usa ka tingga sa kalibre .45 nga pistola.

Ang hiniusang team sa kapolisan sa Placer ug Tagana-an Municipal Police Stations nga mihimo’g follow-up sa maong kaso ngadto sa pipila ka nanimuyo sa Brgy. Banaban, Tagana-an, Surigao del Norte aron suhiron gyod ang istorya nga nagpaluyo sa maong pagpamusil, pakyas sa pagsikop sa suspek tungod kay abtik kaayo kining nakasimhot ug nagdali kining misibat paingon sa wala hisayri nga dapit.

Narekober hinuon sa mga awtoridad gikan sa gipuy-an sa suspek ang usa ka blue nga XRM Sunriser SN-12 SA nga motorsiklo nga may Engine No. LATXCJLXGIBO1665, nga walay Plate Number. Ang maong sakyanan, matud pa, maoy gigamit sa mga suspetsado sa pag-ikyas human nila nahimo ang krimen.

Ang kapolisan nag-andam na karon sa tukma nga kaso batok sa mga suspetsado. (Noel Najarro/Periodico Butuan)